Менә сиңа могҗиза!
- Сеңлем Мәрьям йөгереп
Урамнан кайтып керде.
Бик борчылып, уйланып
Әни янына килде
- – Әни, әнием! Әйт әле
Син ник укыйсың намаз?
Укымасаң да була бит
Болай да вакытың аз.
- Беркем сине ачуланмый,
Рәхмәт әйтми беркем дә.
Шулай булгач ник намазны
Укыйсың көн дә, көн дә.
- Сеңлемнең сәер сүзләрен
Әнием тыңлап торды.
Аннан күкрәгенә кысып
Үзенә таба борды.
- - Нәрсә булды сиңа, кызым,
Нинди сүзләр сөйлисең
Аллаһ кушканга укыйм бит
Әллә шуны белмисең?
- – Беләм инде, беләм, әни,
Мин Аллаһны яратам.
Кешеләр бик укымыйлар.
Менә шуңа шаккатам.
- Әнә күрше апа бүген
Шундый сүзләр сөйләде:
- Аллаһ могҗиза күрсәтсә
Намаз укырмын диде.
- - Кешеләр уйланмый, кызым,
Могҗиза адым саен:
Кара күккә, җиргә, суга
Күзәт кояшын, аен
- Шифалы яңгырлар явып
Җирне дымлый, кабарта.
Бөтен җирдә улән шыта
Гөлләр дә чәчәк ата.
- Пип-пип килеп сары чеби
Яшел чирәмне тарта.
Сыерыбыз да көтүдән
Тәмле сөт алып кайта.
- Йомырканың эче сыек
Ничек чеби булган соң?
Яшел үлән ашап йөреп
Ак сөт каян килгән соң?
- Үзебез дә могҗиза бит:
Куллар, аяклар, күзләр.
Башта акыл, телдә сөйләм
Акылга карап сүзләр.
- Изгелекләр эшләр өчен
Килдек бит без бу җиргә.
Ә күрше апабыз өчен
Дога кылырбыз бергә.
Роза Латыпова
