Корбан гаете иң хәерле көннәрнең берсе

Зөлхиҗҗә аеның иң хәерле көне – ул Корбан гаете көне. Бездә ул рәсми рәвештә бәйрәм итеп үтелә. Корбан сүзе чынлыкта якынаю, ягъни Аллаһ Тәгаләгә якынаю дигән мәгънәдә.

Тормышта Аллаһ Тәгалә безне күп вакытта зур сынау астына куя. Дөнья белән ахирәтне, мал белән рухиятне сайларга туры килә. Әлбәттә, шушы һәр ике нәрсәнең берсе генә Аллаһыга иң якын булганы. Кешеләрнең күпчелеге шуларның үзенә якынрак булганын, хәерсезрәген, фани дөньяда да, ахирәттә дә хәсрәткә илтүчесен сайлый. Әмма корбан Аллаһ өчен, ахирәт өчен үзеңә ләззәт биргән нәрсәне, малны кызганмыйм, корбан итәм дигән сүз. Сарык чалу бу урында бер гамәл, мәгънә генә, иң мөһиме кешенең нияте, аның эчке халәте, иманы. Ибраһим галәйһиссәләм тарихына күз салсак, бу вакыйгада ата да, угыл да сыналды. Ата – Аллаһның кушуы белән улын корбан итәргә, ә улы – корбан булырга әзер булды. Ләкин без беләбез: «Аллаһка корбанлыкларның ите дә, каны да ирешми, Аңа сезнең тәкъвалыкларыгыз ирешә» (Хаҗ сүрәсе, 37 аять).

Аллаһ Тәгаләгә безнең бөтен барлыгыбыз белән буйсынуыбыз, бирелүебез һәм куркуларыбыз кирәк. Чыннан да бердәнбер һәм бар нәрсәне дә Үзенә буйсындыручы Аллаһ Тәгаләгә гыйбадәт кылырга кирәклеген аңлау мөһим нәрсә. Мөэмин-мөселманның бөек максаты булып Хак Тәгаләне олылау һәм Аның әмерләрен тормышка ашыру тора. Корбан гаетеннән соң 1 нче, 2 нче, 3 нче көннәр, ягъни зөлхиҗҗә аеның 11 нче, 12 нче, 13 нче көннәре тәшрикъ көннәре дип атала. Алар дә бәйрәм көннәре итеп билгеләп үтелә. Бу хөннәрдә хаҗилар Ислам диненең бишенче терәге булган хаҗ гыйбадәтенең фарыз гамәлләрен башкаралар. Шулай ук Корбан гаетеннән соң ике көн дәвамында да корбан чалырга мөмкин.