XIV Бөтенроссия татар авыллары эшмәкәр-ләре җыенының пленар утырышы булды

Әлеге чара Бөтендөнья татар конгрессы тарафыннан оештырылды. Җыенда катнашучы шәрәфле кунаклар арасында Татарстан Рәисе Рөстәм Миңнеханов, шулай ук Россиянең 37 төбәгеннән барлыгы 900 делегат – кече бизнес вәкилләре, фермерлар, шәхси эшмәкәрләр бар иде.

Быелгы җыен Россия татар-мөселманнары өчен хәләл азык-төлек җитештерү мәсьәләләре белән үзенчәлекле. Шул нисбәттән әлеге җыен эшендә Татарстан мөфтиятенең “Хәләл” стандарты комитеты җитәкчесе Габбас хәзрәт Шляпошников та катнашты.

Утырыш алдыннан ТР Рәисе Мөфти Камил хәзрәт һәм башка җитәкчеләр белән бергәләп илебезнең төрле төбәкләреннән кәсепчелек әйберләре һәм төрле эшләнмәләр тәкъдим ителгән күргәзмә-ярминкәне карады. Күргәзмә-ярминкәдә 127 эшмәкәр катнашты.

Катнашучылар хәләл ризык (казылык, каз ите), милли киемнәр, бизәнү әйберләре, сувенирлар, чәй, бал һ.б. белән таныша алды.

Пленар утырыш барышында Росаккредитация җитәкчесе Дмитрий Вольвач Татарстан мөфтиятенең “Хәләл” стандарты комитеты җитәкчесе Габбас хәзрәт Шляпошниковка аккредитацияләү турында таныклык тапшырды. Габбас хәзрәт үз чиратында Яшел үзән сөт эшкәртү комбинатына, “Чисто Фри” һәм “Итле-Китчен” компанияләренә “Хәләл” стандартына туры килү турында беренче сертификатлар тапшырды.