Новокуйбышевск шәһәре мәчете 20 еллык юбилеен билгеләп үтте
«20 сентябрьдә Новокуйбышевск шәһәре мәчете 20 еллык юбилеен билгеләп үтте. Әлеге мәчет нигезенә беренче таш 2002 елның 22 июлендә салына. Шәхси иганәләр хисабына гына салынган гыйбадәтханә төзелеше өч елга сузыла. Бу изге эшне шәһәрнең мөселман дини оешмасы рәисе Әхмәткәрим Минекаев җитәкли һәм 2020 елга кадәр мәчетнең имамы булып тора.
Аның вафатыннан соң Аллаһы йортына «Әхмәткәрим Минекаев» исеме бирелү турында истәлекле такта эленә, һәм менә инде 5 ел дәвамында Марат хәзрәт Минекаев әтисенең фидакарь хезмәтен дәвам итә.
Юбилейның мәчет янында үткән тантаналы өлеше татар телендә генә алып барылды. Чарага җыелган кунакларны, мәхәллә халкын имам Марат Минекаев һәм бәйрәмнең мәртәбәле кунагы – Самара өлкәсе мөселманнарының Региональ диния нәзарәте рәисе, мөфти Талип хәзрәт Яруллин котлаганнан соң гыйбадәтханә төзелешен башлап йөргән һәм бу изге эштә катнашкан кешеләрне искә алдылар.
Сүз уңаеннан, бүгенге көндә дә мәчетне күз угында тотып, аңа һәрдаим ярдәм итеп торучы татар ир-егетләре бар икән. Аларга һәм гыйбадәтханә тормышында катнашучы башка актив кешеләргә истәлекле бүләкләр һәм мактау хатлары тапшырылды.
Мәҗлестә Новокуйбышевск шәһәр округы башлыгы Алексей Коробков һәм шәһәр округы Думасы рәисе Сергей Лукин да катнашты. Алар, җирле мөселманнарны мәчет юбилее белән тәбрикләп, алга таба да бердәмлектә, татулыкта, теләктәшлектә яшәргә насыйп булсын, дигән теләкләрен җиткерделәр.
