Мичтә пешерелгән скумбрия балыгы

Мичтә пешерелгән скумбрия балыгы

Кирәк: 2 скумбрия балыгы; 2 суган; 2 кишер; 3-4 аш кашыгы каймак; 1 чәй кашыгы гәрчич (гәрчич яндыра торган булмаса яки бик яратасыз икән күбрәк салсагыз да була).

Әзерләү ысулы: Балыкны эченнән һәм аркасыннан ярырга, үзәк сөяген алырга, ике өлешкә бүләргә. Кыскасы, бу ризыкны әзерләү өчен балыкның ите генә кирәк була.

Соус ясау ысулы: каймак белән гәрчичне бергә кушып болгатырга. 1-2 тырнак сарымсак та уып салырга була. Балыкны майлаган табага тезәргә, өстенә соусның яртысын сыларга. Балык шулай маринадлана торсын, ул арада вак итеп турап суган кыздырырга, аннары суган янына угычтан уган кишер салып бераз кыздырырга да, ярты стакан су салып, шул суы беткәнче уртача утта пешереп алырга. Балык өстенә кишер белән суганны җәяргә, өстенә соус сыларга. Духовкада пешерергә. Балык янына иң яхшы гарнир бәрәңгедер инде... Ашыгыз тәмле булсын!