Чүпрәсез ипи

Чүпрәсез ипи

Глютенсыз, чүпрәсез, содасыз/күперткечсез бик тәмле ипи рецепты

Кирәк:

450 гр яшел карабодай (ягъни 2 тулы булмаган стакан)

1 чай кашыгы тоз

1 стакан су

50 данә җитен (лён) орлыгы (бик файдалы, шуңа мәҗбүри салыгыз);

кабак төше, көнбагыш орлыгы һәм башка төрле орлыклар салырга да була.

Әзерләү ысулы:

1. Яшел карабодайны 8-12 сәгатькә суга салып торырга. Бик каты лайла чыга, аны бик яхшылап юарга.
2. Яшел карабодайга тоз һәм су салып яхшылап блендр белән вакларга.
3. Җитен орлыгы салып тагын берничә тапкыр ваклап алырга. (моны файдасы күбәрк булсын өчен шулай эшләргә кирәк)
4. Аннары барлык калган орлыкларны да салып болгатырга.
5. Ипи пешерә торган савытка камырны салып куярга (ипине алырга җайлы булсын өчен майларга яисә пергамент кәгазь җәяргә).
6. Күпергәнче җылы урында тотарга. Минеке 12 сәгатьләп күперде. Бер пешергәндә 4-5 кенә сәгать тоткан идем, бөтенләй күпермәгән ипи пеште. Шуңа күрә, курыкмыйча 12 сәгатьтән дә әзрәк тотмагыз! Мин батарея өстенә үк куйдым. Яшел карабодай шулай үзлектән бактерияләр җыеп чүпрә кебек әчергә сәләтле.
7. 180 градуска кадәр җылытылган духовкада 1 сәгать тирәсе пешерергә.
8. Бик файдалы һәм тәмле ипи килеп чыга. Аерым закваскалар ясарга да кирәкми. Пешерүгә бер тәүлек җитә. Яшел карабодай гына булсын! Иртән карабодайны суга салырга, кич камырын ясап күперергә куярга, иртән пешерергә була.

Айгөл тимер