Абрикос кайнатмасы

Кирәк:

Абрикос – 4 кг;

Шикәр комы – 3 кг;

½ чәй кашыгы – лимон кислотасы (абрикос әче булмаган очракта гына кирәк була).

Әзерләү ысулы: Катырак абрикосларны алсагыз яхшырак булыр, яхшылап юарга һәм икегә бүләргә. Ваграк итеп турарга да була. Бер савытка шикәр комы белән аралаштырып катлам-катлам итеп салырга. Абрикосларыбыз боткага әйләнмәсен өчен шулай эшләргә кирәк һәм шикәр комы да тизрәк эреп бетәчәк. Көндезен шикәр комы сибеп куйсагыз, кичкә кадәр эреп бетә.

Абрикосларны алабыз, ә савытның төбендә шикәр комы катламы кала, сиропны бутарга һәм уртача утта 10 минут кайнатырга (артык каты кайнарга тиеш түгел. Аннары сиропны сүндерергә һәм кайнар сиропка абрикосларны салырга. Тулысынча суынып беткәч, янәдән сиропны абрикослардан аерып алырга һәм сиропны 30 минут кайнатырга, ара-тирә бутап торырга. Уттан алырга һәм абрикосларны янә сиропка салып тулысынча суынганын көтәргә.

4 тапкыр шулай эшлибез. 4 нче катында сиропны 5 минут кайнатырга һәм төшләрен салып кайнатырга, төшенең кабыгын чистартырга. Моның өчен кайнап торган суга 10 минут салып торырга кирәк. Чистартылган төшләрне сиропка салып 10 минут кайнатырга, аннары абрикосларны өстәргә. Сүрән утта 10 минут кайнатырга. Банкаларны капкачлары белән кайнар суга салып чайкап алырга да кайнатманы банкаларга салып капкач ябып куярга. Чәйләрегез тәмле булсын!