Җилне яманлауның тыелуы һәм ул каты исә башлагач нәрсә әйтергә кирәкле турында

Җилне яманлауның тыелуы һәм ул каты исә башлагач нәрсә әйтергә кирәкле турында

Әбел-Мөнзир Гобәйй бине Кәгъб разыя-Ллаһу ганһү сүзләреннән риваять ителә:

Аллаһның Илчесе галәй-һиссәләм әйтте: “Җилне яманламагыз, ә әгәр сезгә ошамаган нәрсә күрсәгез (ягъни: әгәр аның артык каты исүен күрсәгез), әйтегез: “Әй Аллаһ, дөреслектә, без Синнән бу җилнең яхшылыгын һәм ул барлыкка китергән яхшылыкны һәм аңа әмер ителгән нәрсәнең яхшылыгын сорыйбыз һәм Сиңа бу җилнең начарлыгыннан, ул барлыкка китергән нәрсәнең начарлыгыннан һәм аңа әмер ителгән нәрсәнең начарлыгыннан сыенабыз!” /Аллаһүммә, иннә нәс‘әлүкә мин хайри һәзиһир-рихи, вә шәрри мә фиһә вә шәрри мә үтират биһи!/” (Бу хәдисне Тирмизи: “Яхшы дөрес хәдис”, - дип риваять итә)

Риваять ителә: Әбү Һөрәйрә разыя-Ллаһу ганһү әйтте: “Мин Аллаһның Илчесенең галәйһиссәләм болай дип әйткәнен ишеттем: “Җил – Аллаһның әмереннән, (һәм ул) үзе белән нигъмәт тә, газаплар да алып килә (ала), һәм әгәр сез (аның күтәрелгәнен күрсәгез, аны яманламагыз, ләкин Аллаһка аның хәерле булуын сорап һәм Аллаһка аның начарлыгыннан сыенып дога кылыгыз!” (Дөрес иснәдле бу хәдисне Әбу Давыт риваять итә)

Риваять ителә: Гайшә разыя-Ллаһу ганһә әйтте: “Җил дулый башлагач, Пәйгамбәр галәйһиссәләм әйтә иде: “Әй Аллаһ, дөреслектә, мин Синнән аның яхшылыгын, ул (алып килә торган) нәрсәнең яхшылыгын һәм ул нәрсә белән җибәрелсә, шуның яхшылыгын сорыйм, һәм Сиңа аның начарлыгыннан, ул (алып килә торган) нәрсәнең начарлыгыннан һәм ул нәрсә белән җибәрелгән булса, шуның начарлыгыннан сыенам” /Аллаһүммә, инни әс‘әлүкә хайраһә, вә хайра мә фиһә вә хайра мә үрсиләт биһи, вә әгүзү бикә мин шәрриһә, вә шәрри мә фиһә вә шәрри мә үрсиләт биһи!/” (Мөслим)