Шуаьйблул душ Сафура
Шуаьйблул душ Сафура
ХIакьину жува бусанну Аллагьнал ﷻ идавсну цала миллатрачIан гьан увсса Шуаьйблул душния. Ганин цIа диркIун дур Сафу́ра. Шуаьйб идавсил Ла́я тIисса цамур душгу бивкIун бур. Шуаьйблул кьавм Аллагьнал ﷻ гьалак бувну ливтIуссар, га цува яхьуссар Муса идавс укканнин.
Сафура Мусащал хьунабавкьуссар Мадьян тIисса шагьрулий ца кьувилучIа. Мисрилия (египетнава) лихъан багьсса Муса щяивкIссар ца мурхьирал ххютулу игьалаган. Гъаттара хIачIан байсса хIавзрачIа ганан хIисав хьуссар цала ттурзанну хIачIан дуллалисса инсантал. Гайнная арх бакъа бивкIссар кIива душ, цалами ятту хIавзрачIан гъан хьун къабитлатисса. Мусал цIувххуссар, зула ятту циван хIачIан къабувару, куну. «Тай хIухчалтрал цала ттурзан щиначIату дачин къадурссаксса жу жулами тиккун гъан хьун къабитару», – увкуссар душварал, – «Жул ппу хъинну хъунав хьуну ур». Гай бивкIссар Шуаьйб идавсил душру.
ХIухчалтрал ятту буччиннин хIачIангу бивтун, цала аьдатрайн бувну кьувилул ялув хъунмасса кьасса кьун бивхьуссар. Мусан душварай язухъ хьуну, чару бувкьссар. Душругу цала ттурзан хIачIангу дурну, шаппай бачин дири бувкссар.
Мусагу мурхьиралун зана хьуну, ххютулу щяивкIссар. «Я Аллагь! Ина ттун булунсса гьарца неъматирттах мюхтажну ура на!», – увкуссар ганал, дакIнихтуну Заннайн таваккалгу бувтун.
Душру буттачIан зана бивкIукун, бувсъссар цанма ккавкмур. Шуаьйблул буюр бувссар та жагьил цачIана учIан увара куну. Сафура кIилчингу хIавзрачIан лавгссар. Начлил лачакрах цила лажин кIучIгу дуллай, Мусахь увкуссар: «Ттул бутта вийн оьвтIий ур, вихь барчаллагь учиншиврул…»
Гай ШуаьйблучIан бавчуссар. Цал душ хьхьичI най бивкIссар, ххуллу ккаккан буллай. Мурчал ганил гьухъул ссимиялу гьаз буллай, ччанну чIалан бивкIссар, мунияту Муса цува хьхьичI авчуссар, Сафура ганан ххуллу ккаккан буллан бивкIссар.
Шуаьйблул хъамаличу кьамул увссар ххарину, ненттабакI тIивтIуну. Хъамалугу увну, цанма ккавкмур, бакIрачIан бувкIмур буси увкуссар. Мусал бувсъссар цанма хьумур. «Ина та аьйкьусса Фиръаьвннуя нигьа маусара, Мадьяннал аьрщарай танал цукунчIавсса ихтияр-бияла бакъассар», – паракьат увссар Муса Шуаьйблул. Сафуран хIисав хьуссар Муса Занная нигьа увсъсса, дин дайсса, рахIму-цIими бусса, вихшала дан бучIисса, чурххал кьуват гьарзасса инсан ушиву. Ганил буттахь миннат бувссар Муса цачIава хIухчуну ити куну. «Вин ча кIулли та цукунсса инсаннив?!» – цIувххуссар Шуаьйблул. «Танал гьаз бунни ацIуннал гьаз къабайсса кьун. Жу шиккун нанисса чIумалгу, цува ттуяр хьхьичIун увккун авчунни».
Шуаьйб душнищал рязи хьуну, Мусащал икьрал дурну дур, мяйра шинай цачIава зурча, Сафура щар булунна куну. Му куццуй, Сафура хьуну бур Муса идавсил гьалмахщар. Мадьяннайсса бусурманнайнгу оьвкуну, гайннал хъатIи бувну бур.
Мусал ва Сафурал бакIрачIан чIярусса захIматшивуртту дуркI-ссар. Амма Аллагьнайн ﷻ таваккул бувтун, ссавур дурну, гьарца кьини щукрулий гьан дуллай оьрму бувт-ссар.
