Музагьимлул душ Асият
Музагьимлул душ Асият
Асият бивкIун бур иман, духIин, инсаншиву дусса хъамитайпа. Ганин нясивну бивкIун бур цува Аллагьра тIисса Фираьвннун (Фараон) щар хьун. Ганил дакIнивусса имандалул цIакьшиву хьуссар циняв халкьуннансса вяъза-насихIатну. Мугу ялун ливчуссар Мусан идавсшиву дуллуну, Асият ганайн вих хьусса чIумал.
Ца кьини бучIанмур бувчIул Фираьвннухь бувсун бивкIссар ина Исраиллул миллатравасса цаннал ивчIантIиссара, куну. Мунияту, ганал буюр бувссар циняв бувсса оьрчIру литIун. Муса дунияллийн увккукун, ганал нину хъинну нигьа бувсъссар, цила арсгу Фираьвннул икъавчIан. Аллагьнал ﷻ ганил дакIнивун илгьам бувтссар тIаннул чIапа хIадур бувну, ганиву оьрчI ивхьуну, Нил неххавун ита акьин, куну. Неххал зуманив га чIапа лявкъуссар Асиятлун. Ганил Фираьвннухь миннат бувссар Муса маивчIара, цала къатлуву хъуна хьун ити куну. Му куццуй, Асиятлул Муса Фираьвннул къатлуву хъуна увссар.
Асиятлул бувгьуссар Муса идавсил ниттил кIану. Цила лякълул къаувсса оьрчI лайкьну хъуна увну, Заннал нясив бувмунийн хIадур увссар.
Идавсшиву дулайхту, Муса айивхьуссар халкьуннахь тIайласса диндалия буслай, Аллагьнайн ﷻ мютIи хьун аьркиншиву бувчIин буллай. Аммарив Фираьвннул нигь дуртсса агьали Мусал хъирив бачин анавар къабувкссар. Цайнма мютIи къавхьуминнан Фираьвннул оьсса танмихIру бувайсса бивкIссар.
Цала кулпат Асият цайнма вих бакъа́, Мусал диндалийн, Аллагьнайн ﷻ вихну бушиву кIул шайхту, Фираьвннул амру бувссар ганин гужсса аьзав дувара, цайнма мютIишиву мукIру хьуннин танмихI бувара куну. Асият цила бувгьусса диндалул ххуллия махъунмай къавхьукун, ганин жан дулун багьссар.
Ганил оьрмулуву жуннасса хъуннасса дарс дуссар: ва дунияллул неъматру язи къабувгьуну, тIайламунил, аьдлулул ххуллий жан дулунгу хIучI къаувкуссар.
