Ца чурх кунма бикIанну!
Мизитирттавату яла ххирамур Масжидул-ХIарамри – Маккаллал мизит. ХьхьичIва-хьхьичI дунияллий бувсса мизитгу мури, цуппагу Ибрагьим Идавсил бувссар. Хъирив ххирамур Мадиналивсса Расулуллагьнал мизит Масжиду-Набавийри, хъирив Байтул-Мукьаддасливсса (Иерусалим) Масжидул-Акьса мизитри. Кяъбалул хъирив бувсса мизитгу мури.
Му бакъассагу, Масжидул-Акьса кIицI лавгун бур Кьуръандалул аятирттаву ва Идавсил ﷺ хIадисирдаву. Миву бувсса чаклил даража цамур кIанттай бувмунияр 500-ва лахъссар. Та мизитрал лагмасса аьрщигу барачатссар увкуну бур. Шичча жунма бувчIлай бур Иерусалимрайсса мизитрал даража ва кьимат бусурманнал дянив хъинну лахъсса бушиву. ЦIана тикку хъанахъисса ишругу хIакьину ягу лахьхьу къабайбивхьуссар. Жунма тай так къалмакъал хьусса чIумал дакIнин багьай, амма хъама битан къабучIиссар Палестиннавусса жула уссурвал ва ссурвал цимигу шинал мутталий зулмулуву бушиву. Ургъил бакъашиву дуллан жухьра ихтияр дакъассар. ХIадисраву увкуну бур: «Бусурманнал тагьарданий дакI къацIуцIима жуватува акъар».
Цамур хIадисраву увкуну бур: «Бусурманнал уммат чурх кунмассар: ца базу цIий бухьурча, щала чурх аьзиятрай бикIайссар». Мунияту, жунма лайкьссар гьарца чаклил хъирив къия дирсса бусурманнаха дуаь даву. Кьуръандалуву ялагу баян бувну бур бусурманнал ялун захIматшиву къадирну къаличIайссар, амма Аллагьнал ﷻ кумаг гъанссар, куну. Аллагь Тааьланал ва дунияллий дирхьусса низам укунсса дур: бусурманнал тагьар дикIантIиссар миннал цала диндалух дуллалисса къулагъасрал биялдаралу. Халкь Аллагьная ﷻ арх хъанахъиссаксса, миннал бакIрачIан захIматшивуртту дукIлантIиссар. Ва низам тIайлашиву тарихраву цимиллагу тасттикь хьуссар. Кьуръандалуву увкуну бур: «Халкьуннал тагьар ххуйчулиннай кIура къадаянтIиссар, ми цивппа ххуйчулинмай кIура къабаярча». Мунияту, диндалучIан лажинну кIура къабаярча, жула ялун цичIав ххуйсса къабучIантIиссар. КьюлтI къабувну тIайланма учирча, жува чIявусса кIанттурдаву Аллагьнайн ﷻ мютIину бакъару. Сайки чансса дакъар ца кулпатраву ягу тухумраву арцул, буржирдал, хIусудшиврул цIанийсса къалмакъаллу. Диндалуяр хьхьичIун цайми ишру буккан буллай буру. Архну гьан аьркин бакъар, хIакьинусса кьини тамансса бусурман бур кредитру ларсун миннуй яхъанай.
Му бакъарив Аллагьнал ﷻ ххуллия махъунмай шаву. ХIарамсса дукия, янна думанал дурсса дуаьгу кьамул къашайссар. ХьхьичIва-хьхьичI жува мунил ялув бацIан аьркинссару, цанчирча, Исламрал умматрал сий, узданшиву яларай дагьаврил агьаммур савав мури. Гьунтти шагьрулул майданнив Палестиналул иширттан хас дурсса митинг дувантIиссар учирча, миккун хъазамравух закканагу бишлай азарахъул инсан учIантIиссар, амма кIюрххил чаклийн мизитравун дахьа 100- 200 учIай. КIюрххицIун чIун Аллагьнал ﷻ ляличIину дуаь кьамул дувайсса чIунни. Бачи му чIумал мизитирттавун батIлай, циняв бусурманнаха дакIнихтуну дуаь дулланнуча!
МУХIАММАД МУХIАММАДОВ
