Багьу-бизулул хIакъиравусса хIадисру
Багьу-бизулул хIакъиравусса хIадисру
Аьбдуллагь ибн Масъоьдлул бувсун бур: «Ца кьини Идавсил ﷺ цIувххуна халкьуннахь: "Урив зул дянив цаламур хъуснияр цала варистуралмур ирс ххирасса инсан?" "Акъар жувух мукунсса инсан", - дуллуну дур жаваб гайннал. МухIаммад Идавсил ﷺ увкуну бур: "Щак бакъа, гьарцаманал хIакьсса хъус-аваданшиву – Аллагьнал ﷻ ххуллий харж дурмурди, махъун диртмур тIурча – варистурансса хъусри"».
Ибну Аьббаслул бувсун бур укунсса хIадис: «Адамлул арснал (инсаннал) канихь кIира дара дуцIинсса хъус диркIссания, ганан шамулчинмургу ччанссия. Адамлул арснал лякьа дуцIин къадантIиссар, так (гьаттавусса) аьрщарал дакъа. Пашман хьуну тавба дурманал тавба Аллагьнал ﷻ кьамул дайссар».
Мирдас аль-Асламил бувсъсса хIадисраву увкуну бур: «СалихIсса инсантал дунияллия гьантIиссар куннал хъирив ку. Аьрщарай личIантIиссар чассагул ягу хъалул лув дагьмур кунмасса ссанчIавбакъулт. Ми Аллагьналгу ﷻ ссанчIав ккалли къабантIиссар».
Абу Гьурайрал бувсун бур: «Аллагьу Тааьланал увкуссар: "Цана ххирасса инсаннацIа хьусса чIумал ссавур дурну, Аллагьнаясса ﷻ чирилийн хьул бивхьуманансса Ттул бахшиш – так Алжанни».
Этба́н ибн Малик аль-Ансарил бувсъсса хIадисраву увкуну бур: «Аллагьнал ﷻ рязишиврийн хьул бивхьуну "Ля илягьа илляЛлагь" тIий ивкIманан Аллагьнал ﷻ Кьиямасса кьини Дужжагь хIарам бантIиссар (Дужжагьравун уххаврий къадагъа дишинтIиссар)».
Абу Гьурайрал бувсун бур хIадис: «Къужлул дакI жагьилну личIайссар кIива иширал хIакъираву: дунияллул неъматру ччишивруву ва лахъисса оьрмулийн хьул бишавриву».
Абу Гьурайрал бувсун бур цамургу хIадис: «Аллагьнал ﷻ кьамул байссар инсаннал багьантту, ганан оьрмулул 60 шин хьуннин».
