Цумари хъинма?

Ца ппурттуву, ппалавсса ризкьилул дянив бяст багьну бур, залуннан ххирама ва хъунмасса хайр биян бувайма цумари жула дянив тIисса.

Оьлил увкуну бур;

– Гьай-гьай, наксса хъунмасса хайр заллуннан щилчIав биян къабувайссар, на дулайсса накIри яла буз шаймур.

– Нарив, накIгу дулара, мунил ялун кIукIлусса, тIааьнсса ппалгу дулара, – увкуну бур яттил хIайванналул.

– Бюхъай мукун бикIангу, амма зуща цаннащавагу ттуща куна заллу аьркинсса кIанттайн иян уван къабюхъайссар, – увкуну бур балчаннул. Ажари бивкIун бур ссихI дакъа миннах вичIилий.

– Ци бухьурчангу заллуннан на зуяр цинявннаяр ххирассара. Залуннал ттуйх аяькалий ках учай, – увкуну бур оьлил ялагу. – Ай, юх, нара залуннан яла ххирамур, ттуйн иминну оьвкуну дукия хьхьичI дишай, – тIий бивкIун бур яттил хIайван.

– КъатIайлассару зу кIивагу, – увкуну бур балчаннул рихшантрай, – заллуннан цинявннаяргу нара ххирасса. Мунал гьарица кьини ттул кьамарайх ттарал дурккун на бючIан бувара. Ажари бивкIун бур тинмай ссихI дакъа бавцIуну. Чани хъяхъа учиннин бястлий бивкIун бур ризкьи. Цакуну, тIанкI куну ажари байбивхьуну бур бюхттулну эоь тIий. Ца лахIзалий цинявппа хIайвант пахъ багьну бур. Ялагу, эоь тIий байбивхьусса ажарттул кIюрххил чаклийн изан увну ур заллу. Яла ажарттул ппалавсса ризкьилухь увкуну бур:

– Зуяту цинявннаяту бур хайр. Зу инсантуран ялапар шавринсса дуланмагъ дуллай буру, нарив тIурча инсан чаклийн изан уллай, ахират оьрмулийн хIадур уллай буссара. Дустал, жула оьрмугу мукунмар нанисса. Туну, лайкьссарив ххуйсса тIуллу даву мяш тIун? Хъама мабитари Аллагьнан ﷻ гьарицимурца чIалачIишиву. ХIатта кьюлтI буллалимур ва лабитлатимургу. Хъунасса Заннан ххирассар, ххуймунил бикIу, оьккимунил бикIу мяъшар баву Аллагьнай ﷻ бутлатисса, цинявнан кIул къабувну кьюлтI буллалисса инсантал.

САМИРА МАХIАММАДОВА