Оьккисса макI
Чани хъя-хъя тIисса чIумал Салим цаппара хIаллай цува чув уссарив букъавчIлай ия. Шанювкьусса яругу ссуку буллай, къатлувусса цIаннавун уруглай ия. Яла оьвтIун ивкIуна: «Дадай, дадай!» - тIий.
Жаваб дулуннин къаавцIуну, ниттих луглан ивкIуна. Кухнилуву дада бакъая. ОьрчI увккуна кьатIув, ккавккуна гъаттара-яттин диссин дихьлахьисса нину. Чансса паракьат хьусса Салим чурттуйсса кIанттуй щяивкIун, цахьва цала увкуна: «Ухь, ва макI диркIун дурча!»
ИчIувсса давуртту щаллу дурну шардай нанисса нину, цила арс чурттуй щяивкIун ккавккукун ццах увкуна. Арс левчуна ганил хьунийн увкIун, хъямала агьуна.
– Вин цивхьур, ттул арс? МакIра ци ккаркри, - цIувххуна ниттил, арснал бакIрайх кахгу тIий.
– Дадай, ттун хIакьину аждагьартту ккавккунни. Ялагу ттун ккавккунни ина бакъа́ хьуну! – увкуна Салимлул зурзу тIисса чIуний.
– Ттул арс, оьккисса макIру – ми щяйтIаннул къавкъин тIуллур. ТIааьн дакъасса зад макIра ккаккайхту ина уча: «Ао́ьзу биЛля́гьи мина-щайтIа́ни-рражи́м». Ванил мяънагу – инава Аллагьнахь ﷻ щяйтIаннуя уручча тIиссар. Укун учирча, Аллагьнал ﷻ ина уруччинтIиссара. Заннал жува ххассал байссару гьарца оьмуния, дакIнихтуну миннат барча! МухIаммад Идавсил ﷺ увкуссар: "Ххуйсса макI ккаркманан кIулшача му Алллагьнаяту ﷻ душиву. Заннайн щукругу бувну, цанма ккавкмур цайминнахьгу бусича. Оьккисса макI – щяйтIаннуяр. Мукунсса макIлил оьшивруя Аллагьнахь ﷻ уручча увкуну, щихьчавгу мабусарача. Мукун бувайманан оьсса макIлил зарал къабувантIиссар"» – бувсуна ниттил.
Салимгу дадал лахьхьин бувсса махъру тикралгу буллай къатлувунай увххуна.
