Дустал цукун лякъайссар?
Жува оьрмулул мутталий чIявусса инсантуращал хьуна бакьару: садикрай, школалий, лагерьдай, кьатIув… миннавасса ца-цавай жулва дустал шай. Ца кIанттавату цамур кIанай бизан багьсса чIумалгума инава аьдатсса школа, архIал дуклакими кьабитан ччан къабикIай. ЦIусса кIанайгу дустал лякъин, хIала буххан ччяни къавхьусса кIанттурдугу шай.
• ХьхьичIва-хьхьичI, нач къадурну, тяхъану, пиш увкуну хIала буххан аьркинссар.
• ОьрчIру чIявучин цава ца куццуйссар: тяхъасса, дусшиву ва ихтилатру буллан ччисса, хъинсса. Вин кунма тайннангу нач хъанахъиссар цIуну цачIана увкIманащал кIул хьун, дусшиву дайдишин.
• ХIилларду мадулларда, хIалимну, духIин дуну къуццу бува.
• Винма хIаз бизаймуния, ябацIаймуния буслан нач мадував: цукунсса луттирду ххирассарив, цуми мультикру ххал дувайссарив, чIун дусса чIумал ссахха зун ххирассарив.
• Буси вила кулпатрая: нитти-буттая, уссурварая, ссурварая, зува ча бувкIссарув ва. м.ц.
• Хьуна бавкьукун гайннан ци-дунугу хъун дакъасса пишкаш дуван ягу дукансса нацIу-кьацIу дулун бучIиссар.
• Кумаг аьркинманан кумаг булувара.
• АрхIал чIун гьан дувансса тамансса тIуркIурду, дялахърурду дуссар. БучIиссар винма ххирасса тIуркIулий буклан оьвчин.
• Бюхълай бухьурча, цIусса дустурал нитти-буттащалгу кIул хьуну хъинссар.
• БикIайссар оьккисса махъру тIисса, ссугру дуллалисса оьчIру. Гайннахь гукунмасса махъру тIун къабучIиссар. Хъярчирайн кIура баен булувара ягу дурагу къулагъас къадурну кьабитияра. Цала дуллалимуних къулагъас дакъашиву чIаларча, гай цалла тIуллая бизар хьунтIиссар.
