ТанмихI бантIисарив?
«Мяшну урав, ити мугу чансса тIуркIу буван, акъахьурча вин Аллагьнал танмихI бантIиссар!», – увкуну бур чIаххущарнил цила арснал арснахьхьун аьлахъан машина къабуллусса Исламлухь, – «Вил мяшшиву! Вин Заннал танмихI бантIиссар!» – тIий, цила арснал арснахлу дуклай диркIун дур къари.
Къалмакъал чIирисса диркIхьурчагу (ца оьрчIал гаманахьхьун игрушка къадуллуну дур), баба хIала дурххувкун, къалмакъал гьарта-гьарза хьуну дур.
Гьанттайнмай Исламлул ниттихь цIувххуну бур, мяйжаннугу Аллагьнал ﷻ танмихI бувантIиссарив цала игрушка чIахху-оьрчIахьхьун къадулурча, куну. ОьрчIал дакIнил кьамул дуллай къадиркIун дур мукунсса тагьар: «Циванни нава заллусса машина цаманахьхьун къабулурча ттун танмихI буван аьркинсса», – тIий, чIаххущарнил увкумунийн вих хьун хъанай къаивкIун ур.
Ниттил арснан був-чIин бувну бур цаманахьхьун игрушка къадулавриву бунагь бакъашиву: «Ттул арс, инава заллусса зад цаманахьхьун къадулурча вин танмихI къабувантIиссар. Дулун ягу къадулун – вил ихтиярди. Аллагь – тIайлашиву думари. Заннан кIулссар гьарца ишираву цума тIайлассарив. Цаманал канихьмунийн тамахI бивхьума къатIайлассар, цала хъус дуручлачиманай аьй дакъассар. Шамиллул бабан ччан бивкIуннича увкуну, Заннал вин танмихI къабувантIиссар, ина цукунчIавсса оьккисса тIул къадурнутIий».
Чансса пикригу бувну Исламлул увкуну бур: «Танахьхьун ттула машина булун ччай бакъар, амма та мудан була-була тIий ур. Ттун кIулли танал ва гъагъантIишиву».
Дадал маслихIат бувну бур: «Ислам, къаччарча мабулав. Му бур буттал вин пишкаш бувсса, винма яла ххирамур машина. Винна ххирамур дуруччин аьркинссар. Ччарча, мунихлу Шамиллухьхьун цамур игрушка дула, ягу вила лисапитIрай бигьин ити!»
Гьунттимур кьини Ислам кьатIув уккайхту, Шамил цIунилгу машина була тIун ивкIун ур. Исламлул жиплува цамур машина буккан бувну, буллуну бур Шамиллухьхьун. ОьрчIру архIал бялахълан бивкIун бур. Машинардая бизар шайхту, лисапIитIрай бигьлан бивкIун бур.
Ахттакьун чIумал нину даврия дучIайхту, Исламлул бувсун бур хIакьину Шамилгу, ганал хъунна бавагу рязину ливчIунни, къалмакъал къархьунни увкуну.
Ва иширая махъ Исламлун лавхьхьуну бур Аллагьнан ﷻ гьарзад кIулшиву ва чIалачIишиву. «Аллагьнан ﷻ кIулссар на мяшук акъашиву, так нава заллусса, ттунна ххирасса хъус дуручлай ушиву», – тIисса пикрилий ивкIун ур.
