Щялмахънияр бигьамур
Щялмахънияр бигьамур
Шама дус гъинттул неххавун бучIлан ва вацIлул ахъулсса датIин лавгун бур. Буччиннин щинавунгу бувчIун бувххун бур вацIлул куртIнивун. Кьини ларгсса куц хIисаввагу хьуну бакъар.
Гьанттайнмай нигьа-нигьагу буслай шаппай бавчуну бур.
– Къурталли, дяъвансса мямма ва дада, - тIисса пикрирдащал бивну бур шяраваллил зуманив.
– Ттуйнма барцI ххявххунни учинна, - куну бур Мусал, - бутта нигьа усантIиссар, на цIуллуну-сагъну зана икIаврия ххари хьуну танмихI къабувантIиссар.
Аьлил увкуну бур:
– На учинна ттуна ттатта хьуна авкьуну, ганан кумаг буллай уссияв куну.
– На щялмахъ къабусанна, азарва щялмахънияр ца тIайласса махъ хъинссар, цичIав ляхъан буллангу къабагьанссар, - увкуну бур АхIмадлул.
Лавгун бур оьрчIру шаппа-шаппай.
Бувсун бур Мусал буттахь цала ляхъан бувсса бурцIил хавар. Бутталгу цала гьалмахчу авчинайн оьвкуну, баян бувну бур, жула вацIлуву барцIру бусса бур, куну. Авчинал бувсун бур цала шяраваллил чIаравсса вацIраву барцIру бакъашиву ва бикIан къабюхъайшиву.
Мусал щялмахъ ашкара хьуну, буттан сси бивзун бур: цалчин – шавай чIал хьунутIий, кIилчингу – щялмахъ бувсун тIий. Цакьсса танмихI бувну бур.
Аьлигу ивну ур шавай.
– Дадай, на уссияв щала кьини ттаттан багъраву кумаг буллай, - увкуну бур бухкIуллува.
Амма къатлувун уххавривун гиву щяивкIсса ттаттал хьхьичIун агьну ур.
– Гьула, ина цума ттаттан кумаг буллай уссияв? – пишгу тIий цIувххуну бур къужлул.
Аьли бакIгу хьхьичIун дуртун, учинмур бакъа ливчун ур. Багьну бур ганангу танмихI бухIан.
АхIмад тIима дуснал тIурча, шавай уххавривун ниттихь ва буттахь бусса куццуй бувсун бур хьумур.
– Мяммай, дадай, на багъишла итияра. ТуркIурдахух лавгун чIун хъама диртун ляркъунни. На ххишала мукунсса тIул къадуван хIарачат булланна!, – куну кьянкьасса махъгу буллуну бур.
Нитти-буттал га багъишла ивтун ур.
