Киса

Дяркъусса кIинтнил кьини Саид ттуп-лийгу увккун шавай най ивкIун ур. ХъачIрайн кIусса сумкагу бувтун, бувхсса ччанну гужрай гьаз буллай, так гъелисса чяйлия ва кIукIлусса дивандалия пикри буллай ивкIун ур.

МаркIачIан чIумалсса цIанлакьулуву ганан ца лухIисса зад щуркIал хьуну дур. Кьус ивкIсса – киса ххал хьуну бур. ОьрчI лагмава урувгун ур, амма цучIав чIалай къаивкIун ур. ТIивтIуну бур киса, гиву арцу ва банкрал картарду ляркъуну дур. Гайксса арцу Саидлул ганиннин тачIав канил къадургьуну диркIун дур.

– Ххуйсса ттуп, цIусса телефон ласун хьунссар, - тIисса пикри хьуну бур ганан.

Кислуву хъунмав хьусса хъамитайпалул суратгу диркIун дур. Саид жагь суратрах, жагь арцух уруглай пахъ агьну ур. ДакIниву аьжаивсса гьис куну, оьрчIан дакIнин багьну бур цала ниттища базаллуву киса бакъа хьусса чIумалсса ганил ахIвал, гьулусаншиву.

Шавай учIайхту Саидлул киса ниттин ккаккан бувну бур.

– Ттул мусил кIичI! – увкуну бур ниттил. – Жува ванил заллу лякъинмур банну.

Кислуву ляркъуну дур аьпттикIрава дару лавсъсса чек. Нину ва оьрчI га аьпттикIравун лавгун, хъамитайпалул сурат ккаккан дурну дур. АьпттикIчинан гацIана бувчIуну бур кислул заллу:

– Ва дур Аьшура-бава, шикку арх бакъа яхъанай буссар, – увкуну бур.

АцIра минутIрава Саидлул ганил къапулийн кьутI увкуну бур. Нуз тIиртIуну дур суратрайсса къари-бавал.

– Щукру Аллагьнайн, щала кьини ваних луглай буссияв! – ххари хьуну бур кислул заллу. Гива дурккун чансса арцу Саидлун башхишран дуллан бивкIун бур, амма оьрчIал бакIгу кIутIу дурну, арцу къаларсун дур.

– Къааьркинни, ттиния тинмай личIлулну бикIу! - увкуну, дарвазалува увккун лавгун ур.

Шавай зана шайхту Саидлул бувсун бур кислул заллу хъинну ххари хьушиву. Ниттил Саидлуя цIагу дурну увкуну бур:

– ЧIалай бурив ттул арс, щинчIан кIул къахьурчагу, виятура цIа къадуварчагу, гьарца ишираву тIайлашиву ва аьдлу буван аьркинссар, щинчIав къаккаккарчагу, Аллагьу Тааьланан жува мудангу чIалачIиссару! Чил хъус винна ласавугу хIарамшивур, хъунмасса бунагьри.

Саидлун бувчIуну бур цачIара чIярусса арцу дакъанугу, кьирият, узданшиву, инсаншиву дурурччин бювхъушиву.