Жула оьрчIан лахьхьин буван аьркинмур
Жула диндалуву бур инсаннал оьрму бутаврил хIакъиравусса тамансса насихIатру. Шиву бумур жувагу биттур буллай, оьрчIангу лахьхьин буван аьркинссар, оьрмулуву ччех къабивкIун, кьянкьану тIайламур ххуллийх бачиншиврул.
Нитти-буттан ца-ца чIумал хъамабитай цала оьрчIан оьрмулуву шаттирал бакIрах хьунабакьайсса иширттаву ишла бувансса маслихIатру лахьхьин буван, цала давурттавух, кьининихсса иширттавух лавгун бикIай.
ОьрчIан, хаснува шагьрурдай ялапар хъанахъиминнан чара бакъа лахьхьин бан аьркинмур:
- Цува чув ухьурчагу, ци дулларчагу мудан Аллагьнан ﷻ чIалачIишиву.
- КIукъакIулсса кIанай аьйкьирча, ягу нитти-буттая арх уцарча буван аьркинмур.
- Ца бала-апатI бивсса чIумал буван аьркинмур, масала, цIу лачIурча, цала хъирив инсан агьарча ва м.ц.
- Цала шардаллил адрес ва нитти-буттахъал телефоннал номерду.
- Къавкъинсса оьрчIру, хулигантал бахчирча, буван аьркинмур.
- ЧIун архIалсса оьрчIру аьркин бакъасса кIанайн оьвтIурча, къавкъинсса тIул дуван кIункIу булларча гайннахь учин аьркинмур.
- Цала лагма марцIшиву дуван, буза лазилакьин бан, кIюрххил бизайхту шану батIин ва м.ц.
- Цанна ци-дунугу аьркинсса чIумал чIаравминнахь ягу нитти-буттахь лайкьну ихтилат буван.
- Хъуниминнал ихтилат кьукьин къабувну, адаврай гъалгъа буллан.
- Цува къатIайлахьурча, багъишла ити учин, цахьва багъишла ити тIутиманал ялтту учIан.
- Сси бивзукун, буван аьркинмур.
- Цанна дукра, масала кIюрххилсса дан (чанма-чанну ккунук шахьан, накI дутIин, ччатI бухъан).
- Чурххал марцIшиврул ялув бацIан, ккарччив шюшин, хIажатханттуву марцIшиву дуруччин, янна марцIну лаххан ва м. ц.
- Цала чIун архIалминна-щал ва хъуниминнащал байсса багьу-бизулул, ихтилатрал личIишиву.
- ТIайла бакъамунищал рязи къахьун.
- Цала пикри, учин ччимур нач къадурну, тIайлану бусан.
- ЧIивисса уссу-ссу бухьурча, гайннах буруган, нину-ппу чIарав бакъаний ялув бацIан.
- Арцул хIал, гай харж даврил кьяйда, ттучандалия аьркинмур машан ласун. Буржирай дулаврил ва ласаврил аслу-гьанурду.
- Янна лаххаврил адав, кIучI бан аьркинсса чурххал базурду кIучI баву.
- КьюлтI буван аьркинмур кьюлтIну битаву (масала, цаманал аманатрай бувсмур), ашкара буван аьркинмур ашкара баву, щялмахъ хIала къабаву.
- ОьрчIал ва душварал ихтилат ягу тIуркIу байсса куц, аьркин бакъасса гъалгъарду ва тIуллу къадуллан.
- ЧIирисса щаву диярча, цIунцIия хьурча га дахIин, марцI дуван.
- Дукра дукаврил адавру, чурххан мюнпатмур ва заралмур личIи баву.
- Халкьуннал ялун буххайхту ссалам булун, яхшихаш бан.
