Мяшсса оьрчI
КIилчинмур классраву дуклакисса Муса ивкIун ур хъинну мяшсса оьрчI. Мудан школалийн кканпитIру ларсун учIайсса ивкIун ур, амма щинчIав къадуллуну, цала дукайсса диркIун дур.
Му иш кIулсса Мусал нину-ппугу бивкIун бур цала арс ттигу хъиннува чIивихьунссар, чансса хъуна шайхту лахьхьинссар цачIара думур цайминнангу дуллан, тIий.
Ца кьини Муса ниттищал школалия най ивкIун ур. Наниххуллий гай бувххун бур ччатI ласун ттучандалувун. Муса ивкIун ур личIи-личIисса кканпитIру дусса полкалийн уруглай, дадал цанна нацIу-кьацIу ласунавав тIисса пикрирдаву.
Гайннал чIарав ца къари-бава диркIун дур каниву мюршсса арцу ккалай. Ганил ттучанчинахь цIувххуну бур: «Ттул арс, ттухь ацIра къуруш диялну дакъар, гьунтти диян дан къабучIирив?» «Ина кунмасса циксса буссарив кIуллив?!», - чIу лахъ бувну бур ттучанчинал. – «Цаннан ацIра, гаманан ххюцIалла, таманан ттуршра. Яла кассалувун ттунна лахъан багьай!»
Му иширал бара хьусса Мусал ниттил цила кислува ацIра къуруш дуккан дурну, ттучанчинахьхьун дуллуну дур. «Язухъри ва къарий», - куну бур ниттил Мусал вичIилухун.
«Барчаллагь, ттул душ, ина цIуллу бивуй! На вил арцу гьунттира зана дитанна» ‑ тIий зукьлурду буллан диркIун бур къари.
«ЦичIав къааьркинни, ми вин хIалалссар», - увкуну бур Мусал дадал.
Ттучандалуву хьусса иширал оьрчIал дакIнивун хъунмасса асар биян бувну бур. Шаппай бучIайхтува, цала нацIу-кьацIулул кьуцури буккан бувну: «Диял хьунссар!» - куну бур.
«Ина ци учав, ци диял хьунссар? Миксса кканпитIру хIакьинура дукан ччай бурив?» - пишгу куну цIувххуну бур ниттил.
«Юх», - увкуну бур Мусал, - «Гьунттий вай кканпитIру ттула классравусса циняв оьрчIайх дачIинна, цинявннан диял хьунсса дур!»
