Гьунарчи
ДиркIун дур бигьалагай кьини. Мяйра шинавусса ХIусман кIюрххила шания ивзун, дулланмур дакъа дивандалий щяивкIун щугълурдавун агьну ур. ХIакьину цукунсса гьунар-чувшиву дуван хъинавав тIий, пикрирду буллан ивкIун ур. Къатлувун бувххун бур ганал чIявисса ссу Мариян.
«Мариян неххавун бюкьлай бивкIссания, на ва ххассал бувну гьунар буванссия!», – тIисса пикри хьуну бур оьрчIан.
– ХIусман, ачу ттущал гайз бан кьатIувай, – увкуну бур Марияннул.
– Букьу, пикри буллан бахмачав! – куну, чIивитIун къаччан бикIан бувну бур ХIусманнул.
Му чIумал оьрчIан чIавахьул-ттувух ккавккун бур щаращуя зана хьуну нанисса дада.
«Дадайн барцI ххявхссания, на ганийн ттупанг бивтун бутанссия», - тIий хияллу буллан ивкIун ур оьрчI.
– ХIусман, ттул арс, нану тахIни шюша, ттул кушурду чIявусса бурча, – куну бур ниттил.
– БацIу дадай, на ити, ттул чIун дакъарча, – жаваб дуллуну дур арснал.
Микку ХIусманнул хьхьичIун бувкIун бур ичIувсса ччиту.
«Жула ччиту кьуйлувун багьссания, на ва гива буккан бувну гьунар банссия», - тIисса хиял бувххун бур ХIусманнул бакIравун.
Ччиту тIурча, ганал хьхьичI бавцIуну, ккашилну «мяв-мяв» тIун бивкIун бур.
– Ччит! Бачу тихунмай, вих вичIи дихьлансса чIун дакъарча, – куну, ччан щуну тихунмай бувтун бур ХIусманнул.
ОьрчIрув, бусияра, ва хаварданувусса оьрчIан цукунсса кьимат бищун бучIир. Ванаща га кьини цукунсса гьунарду буван хьунссия?
