“Сивсусса” оьрчI

Интнил каникуллу къуртал шайхту 5-мур классравун цIусса оьрчI увкIуна. Ганан цIа дия Рамазан. Цалчинмур кьинива цинявннан бувчIуна Рамазан нач шайсса, сикъавсусса ушиву. ХьхьичIсса парталух щяитлай унува, рязи къавхьуну, махъра-махъмуних щяивкIуна.

Рамазан ия дарс ххуйну лахьхьайсса, шардай дуллумургу хIарачат бувну щаллу дувайсса оьрчI. Дарс бусан изайхтугу, циняв хIайран хьунсса куццуй, саргъунну, кIанайн бувтун бусайва; жаваб къадуллусса суал къабитайва, щалва класс вичIилий пахъ багьайва. Учительтуралгу Рамазаннуя цIарду дайва: «Бургияра, вана укунни дарсирайн хIадур хъанан аьркинсса!» – тIий. ЦIардая оьрчIан нач хьуну, чIаврду ятIул дичайва, цала махъра-махъмур парталух лаикIан ччисса куна личIайва. Классравусса оьрчIангу Рамазан ххирая. «Ххуйсса оьрчI ур, ламмамшиву дакъасса, кумаг буван хIадурсса, цIувххусса дарс дурчIин дай, задачарду бан лахьхьин бувай. Аммарив сивсусса акъар», – тIун бикIайва.

БувкIуна гъилисса май барз. Ца кьини оьрчIру школалия шаппа-шаппай най бия хъун дакъасса неххал ялтту бувтсса ламуйх. Цакуну ламула оьвтIисса чIурду баллан бивкIуна. Гьанавиххи хьусса оьрчIал янил ляпI учиннин Рамазан тIанкI дурну неххавун ххявххуна, щинал лавсун нанисса душ ххассал буван. Гьузун къакIулсса чIивитIу анаварсса щинал ххюрхху бувну, оьрмулуцIа шавай бия.

– Ттул гьухъа бугьи, лачIу! – увкуна ганихь Рамазаннул.

Душ кIирагу каних ганацIун лавчIуна. Рамазаннул га хIурхIацIакул зуманинмай кIункIу буллай буккан бувуна.

Микку цинявннан бувчIуна сисавугу, чувшивугу, къучагъшивугу так иш багьсса кIанай ккаккан дуван аьркиншиву.