Хъярч
Га кьини кIия дус АхIмад ва Муса школалийн хъинну ччяни бувкIун, дарсру дайдишин ихтилат буллай бивкIун бур.
Мусал увкуну бур:
– АхIмад, ачу жула классравусса оьрчIая хIаз ласуннуча!
– Цукун? – Ттигу щил-бунугу лув ццац бишиннув!? – пишгу куну цIувххуну бур АхIмадлул.
– Юх! Цамур дялахъру ляхъан дуван аьркинни, – куну бур Мусал, – жува баян банну хIакьину математикалул контрольный даву дикIантIиссар куну. Циняв анавархъиннарай хIадур хъанахъи банну!
– БучIир! – рязи хьуну ур АхIмад.
ТIитIин бувну математикалул луттирдугу, хIадур хъанахъи мишан дуллай щябивкIун бур.
Бухлан бивкIун бур классравун оьрчIру-душру. МахIатталну цIухлан бивкIун бур, зу ци дуллай буру тIий.
– Да, ахIмакьтал! Зун къакIуллив хIакьину математикалул контрольный дикIантIишиву? Ягу зу кIиварду ласун ччай бурув! – цинявннан баянну увкуну бур Мусал.
Ца минутIрава щалва класс математикалул луттирдах щябивкIун, цумур тема лахьхьинтIиссарив къакIулну, гьанавиххи хьуну бур.
Га кьини математика диркIун дур махъра-махъмур дарс. Классравусса циняв оьрчIал сайки щалла кьини гьан дурну дур математика тикрал дуллай. Так АхIмад ва Муса пиш-пишгу тIий, хIаз ласлай бивкIун бур.
Бивщуну бур махъра-махъмур дарсирайнсса занг. Бувххун бур бугьарасса оьрмулувусса учительница. Ххал хьуну бур луттирдавун бувхсса дуклаки оьрчIру. Гайннал бувсун бур контрольныйлин хIадур хъанай бушиву.
– На мяйжаннугу хъунмав хьуну бухьунссара, ттун хъама бивтун бухьунссия хIакьину контрольный душиву. Букьияра луттирду, дуккан дувара марцIсса чIапIив. Байбишинну! – куну бур учительницал.
АхIмад ва Муса маз кьавкьун ливчIун бур, амма цинявннащал архIал контрольный чичлан багьну бур.
Щалла кьини хIадур хъанай бивкIсса оьрчIал ххуйсса кьиматру лавсун бур, амма кIия оьрчIал кIиварду лавсун бур. Ми оьрчIру ца бухьунссия?!
