Багъишла итаврил асар

Саид ия аькьлу бусса, паракьатсса, аьдилсса, ххуйну дарс лахьхьайсса оьрчI. Гукун иминсса унутIий, га чIявуну цайми оьрчIал кьякьлухун ишайва «ина хъиннува тIайласса ура» тIий.

Ца кьини ганащал дуклакисса Рамазаннул зия дуруна Саидлул дарсирайн хIадур дурсса проект. Учительнал гайннан кIиннанмагу танмихI бувуна, архIал дурсса тIулдакъашиврун хIисав дурну.

Саидлуща хьунссия цайра аьй дакъашиву, Рамазаннул зия дуршиву бусан, амма му чIумал ганан дакIнин багьуна нюжмар кьини мизитраву цанма бавсса хIадис: «Цанма зарал бувма дакIнихтуну багъишла ивтма Аллагьнал ﷻ хъун увантIиссар» тIисса.

Саидлул увкуна муаьлимнахь:

– Ттуйгу аьй хьунни, проектрах ххуйну урган, ялув ацIан къавхьунни.

Переменалий Рамазаннул цIувххуна Саидлухь:

– Вища хьунссияхха виятура аьй гьан дуван, ина учительнахь гукун циван учав?

– Жула диндалул лахьхьин буллай бур инсан багъишла итан, мунияту на муаьлимнахь къабусав ттул проект ина зия дуршиву.

Мунияр махъ Рамазаннул Саидлухь оьккисса ссихI къадуккайва, цайми бахчиларчагу ганахлу уккайва, цаппара хIаллава цувагу нюжмар кьини мизитравун занази хьуна.