«Багъишла ува...»
«Багъишла ува...»
Чупалав, яннагу ларххун, ччатIул парчлуйнгу кьацIа тIий, кьатIувай увккуна. Ганал ппу тракторданий лавгун ия.
Къатлул мурцIниха, леххан ччай, леххан къахъанахъисса кунма, чIев-чIевгу тIий, хъаругу палцIа тIий, ццахханну дагьсса аьнакIул оьрчIру бувккуна. Гайннуйн къюрмав ччиту ххявхсса ххай, бавкку-шавккусса щяпагу щяту гьаз бувну, Чупалав мурцIнихун левчуна.
Юх, га къюрмав бакъая. Га бия, ччитул оьрчIал магъру кунмасса хIаллурдугу бакIрая зурчIай тIисса, чIаххурал чIивитIу. Цуппагу бия, хъягу хъяй, аьнакIул оьрчIал хъирив багьлай, гайннуйх чартту бишлай.
– ВацIанакул му чару экъибута! – сситтуй увкуна Чупалавл.
– Нания вийх бишлай бакъара.
– Туну ттуйхгу бишлан ччай бурав? – Чупалав душничIан авчуна.
– Вин ци бур? – увкуна чивитIул, махъунмайгу хъанай. – Вайния зул аьнакIул оьрчIру бакъар.
– Жул бакъахьурча, чIаххурал бухьуви.
– Дадай!.. – тIий, цийнна ка щуннинма аьтун бивкIуна душ.
– Гьу, хIаз хъанай бурив? – увкуна Чупалавл, душнил хIаллугу кIункIу бувну. – Гайгу сагъссархха. Гайннунгу цIун бикIайссар.
– Дадай!.. – вев куна душнил цищава шайкун.
Душнил леххаврил чIуний ганил нину кьатIув дурккуна.
– Ва оьрчI ттуйн иллай ур! – тIий, аьрза буллан бивкIуна га, чIугу хъиннува лахъ буллай.
Ци банссия, Чупалавнгу ганил хIаллу итабакьин багьуна. Душнил нину, ссигу бивзун, цачIанна дарчукун, га ци зунссарив къакIулну ливчIуна. Лихъан къабучIия. Лихъарча, нитти-буттахь бусанссия, къалмакъал гьаз хьунссия. Га вас-ццахливу Чупалавн дакIнин багьуна, цащава пинжан гъавгъукун, мяммал дада къадяъваншиврул, буттал увкусса махъру.
– Багъишла ува, – увкуна Чупалавл, бакIгу хьхьичIун дуртун. – Ва бия аьнакIул оьрчIайх чартту бишлай. Язугъ хьуну, тай пакьиртал ххассал буллай уссиявча...
– Ва жуна маччасса оьрчIрихха, – увкуна ниттил, цила аьтисса душгу ка дургьуну шаппай буцлай. – Цувагу, чIивинугу, цуксса мяърипат дусса ур! Багъишла увагума увкунни. Ва жул душ инагу ва цалсса багъишла бува, ххирама. Ххишала ванилгу чартту къабишлантIиссар.
«Багъишла ува...» – увкуна Чупалавл цахьва цала. – «Багъишла ува...» – вайнна винма учингу бигьасса, гьарца задраяргу гуж бусса махъру...»
Н. Юсупов
