«Паракьатшиврул ахъулсса»
Китай ккалли бувайсса бур цIулитул ватанну. Тикку ва ахъулссаннул мурхьру хъинну чIявусса бугьайсса бур. Китайнаву цIулит хIисав бувайсса бур лахъисса оьрмулул ва тIайлабацIулул лишанну. Ухссавнил Американаву цIулитуя чIяручин консерварду дурну, цайми хIукуматирттайн даххайсса дур.
ЦIулитуйн учайссар «паракьатшиврул ахъулсса». Гьалак увксса, вас-ццах багьсса чIумал букарча паракьат хьун кумаг бувайссар.
ЦIулитуву чIявуссар сахароза, личIи-личIисса кислотарду, клетчатка, белок, чIявуссар калий, железо, марганец, йод, витаминну С, В, В, РР, Е ва м.ц. ЦIулит хъинссар ччаруллал, ттиликIрал, сситту-къатлул къашавайминнан, хъинссар гемоглобин чанминнан. ЦIулитуясса мюнпат хъунмассар, агарда канарча дачIраххюттуйн. ЦIулитул сокрал ххютту ххуйну зузи дувайссар, хъинссар гьут-рурдал къашайшиву думиннан. Экзема дусса инсаннан цIулитул чIапIая дурсса ваннарду хъинссар. ЦIулит мюнпатссар ччимур журалий – цIуну бунува, компот дурну ягу мураппа дурну. Так мугъаятну бикIан аьркинссар диабет ва аллергия думи.
ЦIулитул чурх антиоксиндантирдал буцIин бувайссар, ракрал цIуцIавурттая буруччин хъинссар, бурчу цIулаган бувайссар, къюкIлин ва ттуннурдан мюнпатссар, дукра лялияву ххуй дувайссар, яруннан хайр шайссар, чурххава токсинну буккан бувайссар, хъунав шаву хIурхIа дайссар, бакIрал нярян хъинссар.
Лякьлуву оьрчI бусса хъаннин цIулиятусса мюнпат хъунмассар. Ваниву дуссар ниттин ва оьрчIан хъинсса фолиевая кислота. Мукунма, цIулитул кумаг бувайссар токсикоз хьусса чIумал.
ЦIулит хIаласса ца-кIира рецепт
– Гьутрурдал, ттиликIрал, сситту-къатлул къашавайминнансса:
Гьантлун 2-3-ла цIулитул сок-рал бачIи стакан ягу ца стакан хIачIаван аьркинссар, дукра дукан дачIи ссятрал хьхьичI.
– КъюкIлил цIуцIаву думиннан, кьавс хьуминнан, гастрит думиннан:
Гьарца кьини хIачIаван цIуну дурсса цIулитул сокрал ца стакан, 5 бутIуйх бавчIуну (1/5) стакан, дукра дукан дачIи ссятрал хьхьичI.
