Циванни аьнч учайхту Заннайн щукру буван аьркинсса?

Жула диндалул цавагу оьрмулул иш лях личIан бувну бакъар му ишираву къуццу бувайсса низамрая къабувсун. Ласунну аьнч учаву. Мукун чIивисса иширахгу Идавсил ﷺ къулагъас дурну дур. Аьнч увкуманал «АльхIамдулиллагь» учин аьркинсса куну. «АльхIамдулиллагь» тIисса мукъул мяънагу – «Аллагьнайн щукру». Мукун учаву суннатссар, чири шайссар. ХIадисраву тIий буссар: «Аллагьнан ﷻ ххирассар аьнч учаву ва къаххирассар гьагь бигьаву. Мунияту аьнч увкукун «АльхIамдулиллагь» учияра» (АхIмад).

Аьжамрайсса «ГьунчIукьатIан» луттираву чивчуну бур: «Аьнч учаву хъинссар, Аллагьнан ﷻ ччиссар, щяйтIаннун къаччиссар. ХIатта, лув-ялув шамилва аьнч учирча, иман дакIниву цIакь шайссар. Шамийлва учаву хъинссар, ххишала къахъинссар. Ихтилат буллалини, хавар бусласини аьнч учирча, бусласимур тIайла шайссар. Аьнч бивукунгу, бакI хьхьичIун дуртун, лажин кIучI дурну, ягу кьацIлий хъат дирхьуну, чIу лахъ къабувну, бюхъайссаксса лагьну учаву хъинссар.

Му увкукунгу «альхIамдулиллагь» учинссар. Мукун учирча бурхIал, вичIилул, лякьлул цIуцIаврия имин шайссар. ЧIарав цайми бухьурча миннангу баянну лахъну учаву хъинссар, мунал «альхIамдулиллагь» увкукун, чIаравманалгу «ярхIамукаллагь» учиншиврул. Ялагу аьнч увкуманал «ягьдиякумуллагь ва яслухIа балакум» учинссар. Аьнч увкуманал «альхIамдулиллагь» къачирча чIаравманал учаву хъинссар, ккарччал, лякьлул, вичIал цIуцIаврия имин шайссар». Циванни хаснува аьнч увкусса чIумал щукру буван ккаккан бувсса?

Аллагь Тааьланал инсан ляхъан увну ур тамну, чурххал гьарца базу камилну зузи бувну. Мунияту, аьнч учаву цукун бигьасса, укунмасса задну чIаларчагу, мунилгу дуссар куртIсса мяъна. Аьнч учаву – жуйва Заннал бивхьусса цIимигу, инсаннай аякьа давугур. Жува пикривагу къабувару аьнч учаврил инсан циксса тIааьндакъашивурдая уручлачиссарив.

1. Аьнч учаврийну инсаннал майравусса ххит ва аллергенну буккан бувайссар.

2. Аьнч увкусса лахIзалул мутталий чурххава ттуршазарвахъул заралсса бактериярду буккайссар.

3. Аьнч учаву сававну заралмур гьутрурдавун къадуххайссар. Мунин бувну аьнч учаву янил ляп учиннинсса мутталий инфекция духхаврин баруну шайссар.

4. Аьнч учаврийну гьутрурдавун марцIсса гьава буххайссар. Цири ялагу аьркинсса Заннайн щукру буваншиврул! АльхIамдулиллагь. Аьнч учаврилгума жунма чIалачIи буллай бур Аллагь Тааьланал гуж-кьудрат ва хIикматшиву.

МАДИНА МУСАЕВА