Арулла цIуцIаврин дарман

Арулла цIуцIаврин дарман

КьустI аль-Гьинди (Костус, Кыст) – хъанахъиссар мурхьирдал ца жура. Мунил лахъшиву дикIайссар 1,5-2 метра, цуппагу ххяххайссар Индиянаву, Американаву, Африканаву, Азиянаву ва Аьрабнал хIукуматирттаву. Амма мунил ватанну хIисав дувайссар Индия, аьраб мазраву «альгьинди» тIисса мукъул мяънагу «индиянавасса» тIиссар. Дарувран ишла бувайссар мунил мархри ва ккири. Аьрабнал ва Индиянал кьустIлил дикIайссар кIяласса тIутIив, Сирияналмунил – лухIисса. Мунил мархрава дуккан дувайссар эфирный нагь.

МухIаммад Идавсия e жучIанма бивсса хIадисраву увкуну бур: «КьустI альгьиндилул хъин дувайссар арулла цIуцIаву» (АльБухари). Цамур хIадисраву увкуну буссар: «Зу бувайсса дарурттаву яла хъинми – хIижама ва кьустI альгьинди хъанахъиссар» (АльБухари). ХьхьичIазаманнай мунил мархри кьакьан бувну, хIувуну ишла бувайсса бивкIссар аьтри хIисаврай. Му бакъассагу хьхьичIавасса духтуртурал кьустI ишла бувайсса бивкIссар щавурду хъин дуван, чурххава токсинну буккан буван, дукра бигьану лялиян дуван, хъамитайпалул оьрчI баву бигьа буван ва м. ц.

Индиянаву ва Китайнаву му ххяххия ишла дувайсса диркIссар инфекцияул цIуцIавуртту хъин дуваншиврул. Латиннал Американаву кьустIрая бувсса даруврайну чурх марцI бувайсса бивкIссар паразитарный азардая. КьустI муданна ишла дувайсса диркIссар косметологиялувугу, муния кремру, ссахIван ягу порошок бувну. КьустI аль-гьиндилул хъин дувайссар вай цIуцIавуртту:

• ЦIумулул тагьар къулай дувайссар;

• Лякьа кьянкьа шаву рахIат дувайссар;

• Лякьа лахъаврин кумаг шайссар;

• ЦIумулул язва хъин даврин кумаг шайссар;

• Ххюттукалул цIуцIавуртту хъин дувайссар;

• ТтиликIрал къашайшивурттан кумаг шайссар;

• КIущин баву бигьа шайссар;

• Сситтул пурпуххилул цIуцIаву хъин дувайссар;

• Чурххал иммунитет цIакь дувайссар;

• Гьутрурдал къашайшивурттан кумаг шайссар;

• КIиришиву яларай дутайссар;

• Щиртри буккан бувайссар;

• Бурчуйсса щавурду хъин дуван кумаг бувайссар;

• Стафилоккок, стрептоккок ва цаймигу бактериярдая шайсса инфекциярду хъин дувайссар;

• Къювурду хъин дуван кумаг шайссар;

• Гонорея хъин дувайссар; Жула республикалий кьустI аль-гьинди машан ласун шайссар исламский тучаннава ягу гьанна-уртту даххайсса кIанттава.

МУСЛИМ ОЬМАРОВ