Суал-жаваб

Суал-жаваб

БучIиссарив лякьлуву оьрчI бусса хъамитайпалун щябивкIун чак буллан, лавай бизан духтурнал ихтияр дуллай бакъахьурча?

Лякьлуву оьрчI бусса хъамитайпалухь духтурнал ччаннай бацIан къабучIиссар учирча (оьрчIан зарал къахьуншиврул), мунин бучIиссар щябивкIун чак буллан, цанчирча, лякьлувусса оьрчIан нигьачIинсса тIуллу дуллан къабучIиссар.

(«ХIашиятул-Жамал», «Ал-ашбахI ва-нназаир»)

ХъатIан чак къабувнува шанан утту ивхьуну, яла кIюрххил чаклил чIун дучIаннин чантI увкуманан бучIиссарив тагьажжуд-чак буван?

Тагьажжуд учайссар хьхьувай шания ивзун бувайсса суннат-чаклийн. Цавай аьлимтурал тIимунин бувну, тагьажжуд баннин хъатIан чакгу бувну, чансса бунугу шану лахъан аьркинссар, цал чак бувну яла шанарчагу ягу цал шану лавхъун яла хъатIан чак буварчагу.

Мува куццуй, цаппара аьлимтурал луттирадву чивчуну бур баргъ лавгун махъ утту ивхьуманан бучIиссар тагьажжуд буван тIий, вайминнал увкуну бур хъатIан чаклил чIун дуркIун махъ утту ивхьуманан бакъа къабучIиссар, куну.

Мунияту, хъатIан чак къабувну утту ивхьуну, кIюрххил чаклил чIун дучIаннин ивзманан бучIиссар хъатIан чакгу бувну тагьажжуд буван.

КIай шартIругу биттур дурну, хъатIан чаклия махъ бувсса цумур бунугу чак тагьажжудну ккаллиссар, масала, хъирив лахълахъисса фаризасса чак ягу суннат-витру.

(«ТухIфатул-мухIтаж», «ХIаваши Ширвани»)

Суннатсса чак буллалима имамну, фаризамур буллалима мунал хъирив авцIуну архIал чак бан бучIиссарив?

Суннатсса чак буллалиманал ягу фаризасса чак хъирив лахълахъиманал хъирив авцIуну чак бан бучIиссар. Мукунма ихтияр дуссар ахттайн чак буллалиманал хъирив ахттакьун чак бан ва м.ц.

Аммарив цаппара диндалул аьлимтурал тIимунин бувну мукунсса чак хIисав бакъассар, мунияту цалва-цалвалу буварча хъинссар.

(«ТухIфатул-мухIтаж», «ХIаваши Ширвани»)

Кьуръандалул луттираву ягу «Бисмиллагьи-р-рахIмани-р-рахIим» чивчусса конвертраву арцу дишин бучIиссарив?

Кьуръандалуву ягу аятру, Аллагьнал ﷺ, идавстурал цIарду, диндалул элмулул чичрурду дусса луттирдаву арцу дишин къабучIиссар, хIарамссар. Мукунма, «Бисмиллагьи-р-рахIмани-р-рахIим» чивчусса ягу муниха лархьхьусса чичру дусса конвертраву дишингу къабучIиссар.

(«ФатхIул-муин», «Иаьнату-ТIалибин»)

БучIиссарив мизитраву чIирайн ттиликI рирщуну шанан?

Мизитраву шанан бучIиссар инсан «джунуб» хьуну (чурх шюшин, гъуслу буван аьркинну) акъахьурча ва гиву чак буллалиминнахун ахчилай, гай къума буллай акъахьурча. Вай шартIру биттур къадуварча, мизитраву шанан къабучIиссар, хIарамссар.

Мизитраву щябикIан бучIиссар ччимур куццуй: чирайн ттиликIну, чулий, ягу лякьалавай утту бивхьуну, ччанну ччимур чулинмай ита бавкьуну.

(«ТухIфатул-мухIтаж», «ХIашияту-Ширвани», «Ал-Мажмуъ»)