Суал-жаваб

Суал-жаваб

Чакливу кIилчинмур ракааьтрал ахирданий «аттахIийяту» (ташагьгьуд) дуккин хъамабитарча, чак зия хьунтIиссарив?

Мукунсса чIумал чак зия къашайссар, цанчирча, шанна ягу мукьра ракааьт дусса чакурдиву цалчинмур «аттахIийяту» дуккаву фаризану къахъанахъиссар. («Равзат ат-ТIалибин»)

МухIаммад идавс ﷺ хIатталив къаувччуну, Аьишатлул къатлуву циванни увччусса?

Идавстурал ца хасшивур рухI ларсъсса кIанай уччаву. Ибну Абу-Шайбал бувсун бур Абубакрдуя: «МухIаммад идавс ﷺ накьлу хьуну мукьах ганал чурх тинмай-шинмай къабувссар».

Имам Тирмизил «Сунан» тIисса луттираву Абубакрдуя укунсса хIадис бувсун бур: «Ттун Идавсия ﷺ укунсса махъру бавуна: «Аллагьнал ﷻ гьарца идавснал рухI ласайссар га цува уччин нясивсса кIанай»».

Шахматрай буклан ихтияр дурив жула диндалуву?

Имам Нававил «Мажмуъ» тIисса луттираву чивчуну бур: «ЛичIину хайр бусса тIуркIу бакъахьувкун, муний буккаву карагьатссар (къахъинссар). Бунагь-хIарам бакъанугу, къабукларча хъинссар».

КIия инсан цачIу бавцIуну чак буллалисса чIумал ялун увкIсса инсан чакливун цукун уххан аьркинссар?

КIиннал жяматрай чак бувайни, имамнал хъирив буллалима ацIайссар урчIа чулух, ччаннал кIисри имамнал ччаннал дянив биянсса куццуй.

Гайннал ялун шамулчинма увкIун, жямат-чакливух хIала уххан ччисса чIумал, га ацIайссар имамнал куя чулух. Ниятгу дурну чак бахIайссар. Яла кIиягу маъмум (имамнал хъирив бавцIуми) махъунмай ша бувну, цачIу бацIайссар.

(«Иаьнату тIалибин»)

ХIарамну ляркъусса арцу хIалалминнущал хIала духхарча, ци бан аьркинссар?

ХIарамсса арцу циксса диркIун дурив хIисав дурну, гайннува гайксса личIи дуван аьркинссар, лирчIми цала аьркиншивурттай ишла дуллан бучIиссар. («ФатхIул муин»)

Лас ва щар цачIун шайни дуккайсса дуаь дуссарив?

Мукунсса чIумал дуккайсса ца дуаь вари: ««Бисмиллагь, Аллагьумма жаннибна щайтIана ва жанниби щайтIана ма разакьтана». Мяъна: «Я Аллагь, жуяту ва жун нясивминная (авладрая) щяйтIан арх бува». Ва дуаь дурккуну цачIун хьусса лас-щарнин оьрчI барча, ганин щяйтIаннуща зарал бан къашайссар куну бур МухIаммад Идавсил ﷺ.

Ттул душнин ччай бур цила ниттил ниттил гьаттай тIутIив дугьан. Дуссарив мунин ихтияр Исламраву?

Диндалул аьлимтурал луттирдаву чивчумунин бувну, гьаттай щюллисса кьярти дургьуну хъинссар. Муниву буссар Идавсил ﷺ сунна биттур баву. Га щюллисса къяртлул буллалисса тасбихI сававну гьаттавуманал аьзав бигьа шаврин хьул буссар.

Ибну ХIажардул «ТухIфатул-мухIтаж» тIисса луттираву къадагъа дирхьуну дур гьаттая шюллисса уртту, ххяххия риттаврин, цанчирча, ми риттаврийну жува гьаттавуманан аьзав бигьа дайсса багьана букьан буллалиссару. Кьаркьсса уртту риттун ихтияр дуссар.

ГIабдуллагь ибн ХIамидлул «Муснад» тIисса луттираву чивчуну бур гьаттай дугьаймур жаназалул бакI дусса чулух дургьуну хъинссар тIий.

ХIасил, гьаттай тIутIив дугьангу ихтияр дуссар.