Барча баву
Ас-саламу аьлайкум ва рахIматуллагьи ва баракатугьу, ххирасса уссурвал ва ссурвал, хIурмат лавайсса жямат!
ДакIнихтунусса ххаришиврущал барча тIий ура жула ялун нанисса Рамазан барз – зума дугьаврил, Кьуръандалул, цIимилул ва ялтту бучIаврил барз. Ва Заннал Цала лагътуран буллусса ляличIисса неъматри: рувхIанийсса марцIшиврул, дакIнихтунусса тавбалул, иман цIакь даврил ва тIул-тIабиат исвагьи шаврил манзил.
Рамазан барз жунма хьуннав бавкьусса, цIими гьарзасса, чIаравминнай аякьа дуллансса, кулпатру цIакь хьунсса, мюхтажминнан, ятинтуран, мискинминнан кумагрансса.
Ва мубараксса зуруй дуаьрду дулланну хасъсса аьралий операциялий Ватан дуручлачиминнаха. Заннал буруччиннав, кьянкьашиву, чувшиву, хъиншиву нясив дуваннав, оьмуния ххассал баннав, тайннал кулпатирттан ссавур дулуннав!
Рамазан зурул барачатшиву гьарца къатлувун духханнав, жула дакIру имандалул чанна лахъаннав, жула аьрщарай дакьаву, паракьатшиву, куннал куннахсса хIурмат чан къахьуннав. Жула хъинбаларду, чирилунсса давуртту Аллагьнал ﷻ кьамул даннав! Амин.
