Оьрмулул низамрансса маслихIатру
Оьрмулул низамрансса маслихIатру
ДакIнивун бувххун, кIулвагу бакъанува хасият ва оьрмулух буругаву даххана дувайсса махъру бикIай. ХьхьичIра агьамну чIалай диркIмур махъун дагьай, къулагъас къадуллай бивкIмур оьрмулул бутIану шай.
ДакIниву иман думанал шикку чивчумур цала оьрмулул низамну хьун къабувну чара бакъассар.
ТIарикьатрал аслу-гьану – хъинсса тIул-тIабиаьт душивури, мунил мяънагу – инава Заннал лагъ ушиву бувчIавури.
Халкь ххирашиву, миннаха хIурмат баву – хъинсса хасиятрал лишанни.
ТIарикьатрал хIакьмур – цайминная винма биллалисса заралунничIа ссавур дурну, гайннан виятува я канийну, я дакIнийну зарал биян къабавури.
Халкьуннащал инсап, тIайла-шиву дуну икIу, амма гайнная вичIанна инсапшиву тIалав мадувара.
Бусурмансса инсаннал адаврал яла агьамсса ца кьяйда хъанахъиссар Аллагьная ﷻ арх уллалисса пикрирдая цала дакI дуруччаву, ми пикрирду ххуйсса бухьурчагу, оьккисса бухьурчагу. Цанчирча, ми кIивайвагу Аллагь ﷻ кIул шаврил ххуллийсса пардавру дунутIий.
Циняв бунагьирттал гьану – дуниял (хъус-хъиншиву) ччишивур, дуниялгу – Аллагь ﷻ хъама итан увайсса задри.
Гьарца аьмалданул аслу – бивгьусса ссихIри, мунияту гьарца ссихI ласайни Аллагь ﷻ дакIнин улути.
Элму лахьхьин ччиманан ца калима гьассар: «Мудан Аллагь ﷻ кIицI лаглагу» (каних даву дуллай ухьурчагу, дакIнин Аллагь ﷻ хъама итан къабучIиссар).
Мудан дакIний бити, вил мурад – вил кьастри, вил кьастгу – ина икрам буллалимурди.
Я муъминчу! Аллагьнал ﷻ лагъну икIу, хIалкьазиялул лагъну маикIара.
Суфий – му так хIакьинусса кьинилулсса бакъа къабуллалимари, цувагу мукьуннивасса ца тагьарданий: барачатшивруву, захIматшивруву, эбадатраву ягу аьсившивруву.
ЗахIматшивурттаву Аллагь Тааьланая кумаг чIа къаучаву – Заннал цIими кьукьаврил сававри.
ПаччахIтурачIан гъан хъанахъисса инсан Аллагьная ﷻ арх уцайссар.
Душманнал чулиннай пикрибакъашиву дикIан къабучIиссар, ганая дус хьуну ухьурчагу.
Иман думанал пикри буван аьркинссар вай мукъурттил ялув: «"Ттул оьрмулуву яла барачатмур кьини – ттун авчинал ккаччи ва ганин на ххал къавхьусса кьинир", - тIий бивкIун бур бюрх».
КIулну икIу, рувхIанийсса камилшивруйн тамахI бихьлахьиманал тагьар – Фиръаьвннул тагьар куннассар.
Шайх Абу Язид аль-Бастамил цIувххуссар: «Я Аллагь, ВичIан гъан шаврил ххуллу цумурди?» - Заннал жаваб дуллуссар: «Вила нафсгу, «На» учавугу кьабитича, ТтучIан гъан хъанахъу», - куну.
ТIарикьатрал аьмсса гьану – устазнахсса ччаву дуну икIаву ва кьянкьану Шариаьтрал ххуллу бугьавур. Мугу гьарца ишираву дянивалу дугьавури: аьмаллаву, ихтилатраву, хасиятраву ва хIалдануву.
Бур тамансса луттирду, личIи-личIисса эбадатру, ккал дуван къашайсса насихIатру, амма ми гьарзад цачIун дуллай дур цаннил – Аллагьнал чулиннайсса ﷻ ва ляхъан дурмунил чулиннайсса адав.
АллагьначIансса ﷻ адав – инава Заннан чIалай ушиву кIулну эбадат-тIааьт давур.
Аллагьнал ﷻ ляхъан дурмунил чулиннайсса адав – гайннаяту винма ккаккан ччимур инавагу гайннан бавур.
Царагу даву мадувара ххуйну пикри къабувну, маслихIат-мушавара къабувну, истихара къадурну.
Вила кьимат, авуршиву яларай дутаймур мабувара.
Ца шайхнал цIувххуну бивкIссар цала муриднахь, шагьрулуву ци хаварду бур, куну. «На хавардал хъирив къаацIара», - увкуссар муриднал. Яла шайхнал увкуссар: «Гьарца бусурманчувнал мукун буллан аьркинссар», - куну.
Шайх Абу Язид аль-Бастамил увкуссар: «КIия инсаннал дянивсса ччаву камил къахьунтIиссар цаннал гаманахь "На – инара" къаувкуссаксса».
Буржирай чIа тIиманахьхьун дула зана къадитарча хIалал дуван хьунссаксса. Арцу ма́хъ дулунну цичIав мадаххара.
КIулну икIу, чумартсса, сахаватсса инсаннал хIайп къаучайшиву.
ГьарцанначIан цIими буну, мискинми ххирану икIу, ми вичIанма гъан булува. Дукиягу так хIалалмур дуки.
Аваданминнащал маикIаванна, кIулну икIу, яла оьккимур дукра – аваданминнал дукра душиву.
Бястру буллалиминная архну икIу.
Ина Аллагьнал ﷻ лагъ ухьувкун, ссайнчIав тамахI мабулларда.
Шайхтурал бувсун бур, ас-ламус ва кьирият тIарикьатрал чара бакъасса шартIру душиву.
Халкьуннал чулиннайсса хъиншиву – идавстурал ва салихIинтурал хасиятри.
Аллагьнал ﷻ мукъурттил ялув пикри бува: «Зу кIиягу (Муса идавс ва Гьарун ) наси ФиръаьвннучIан, та аьйкьуну унутIий. Танащал бувайсса ихтилатгу иминну, кIукIлуну бувара – балики та чантI учин ягу Аллагьная ﷻ нигьа усан».
Инсантал ххирану икIу, гай бусурмансса бакъахьурчагума, цанчирча хIадисраву увкуну буссар: «ДакIурдивусса сситтуя личIлулну бикIи, сайки хIайвантраягума».
Аллагьнал ﷻ мукъурттил мяъналул хъирив ачу: «Халкьуннал чулиннай ссавур дуну икIу, хъинбаларду буллан амру бува, аьвамтурал дуллалимуних къулагъасгу мадувара».
Гьарцаннан дакIнихтунусса маслихIатчи хьу.
Гъибат-бугьтан мабувара, щялмахъ мабусара. Виятува гъибат-бугьтан бувминнаха ва инава бувминнаха ххуйсса дуаь дулува.
Вила бакIчинах вичIи диша захIматшивруву ва бигьашивруву. Лайкьсса инсаннал канихьсса бакIчишивруйн тамахI мабихьларда.
Вищара дуван шаймур цаманайн тапшур мадувара.
Инава чув ухьурчагу тIайламур буси, Аллагьнал ﷻ диндалуву аьй-бювкьурдая нигьа маусара.
Кьаагьну икIу, Заннаха ﷻ лагъшиву ва эбадат халватраву (щинчIав къаккакканну) дулува.
КIулну икIу: Винма хъинбала буллалима ва оьбала буллалима личIи-личIину чIалачIаву – му имандалул хьарашиврул лишанни.
КуртIну пикри бува Аллагьнал ﷻ мукъурттил мяъналул ялув: «Цавай цайминнал хIал ххал буваймину бував, зу ссавур дувайрив ккаккан».
ХIадисраву увкуну бур: «Зунтту сукку хьуну бур тIий баярча, зу мунин вих шияра. Амма инсаннал ниттил лякьлува найдунурасса хасият даххана хьуну дур учаврин вих машари».
ЧIяруну вай дуаьртту тикрал дуллали:
لَا حَوْلَ وَلَا قُوَّةَ إِلَّا باِللهِّ
اَلْحَمْدُ لِلهَّ رَبِّ الْعَالَمِينَ حَمْدًا يُوَافِي نعِمَهُ وَيُكَافِئُ مَزِيدَهُ
إِلَهِي أَنْتَ مَقْصُودِي وَرِضَاكَ مَطْلُوبيِ
«Ла хIавля ва ля кьуввата илля биЛлягь».
«АльхIамдулиЛлягьи раббиль аьламин хIамдан ювафи ниаьмагьу ваюкафиу мазидагь».
«Илягьи анта макьсуди ва ризака матIлуби».
Щейх АхIмад-афанди
