Жула дакIурдил хIасрат

Жула дакIурдил хIасрат

Журналистурал чIявуну цала макьалардан ляхъан дувай буккултрал я бацIансса цIарду. Амма ва макьалул цIанил ялун личин дуллалиссар хIакьинусса кьинисса жула дакIурдил тагьар.

Инава кунасса, амма гьарзадрацIа хьуну ливчIсса инсантурая, дацIаву дакъасса бомбардал гъаралу тайннан гьарца минутIрай духIан багьлагьисса захIматшивурттая, цукунчIавсса аьй дакъасса гъан-маччами ливтIуну ливчIминная пикри бувсса чIумал, щилчIав дакI паракьатну къаличIанссар. Къювулул ва цIимилул дурцIуну дур дакI.

Укунсса бала-апатIру цамур билаятрайсса халкьуннайн бивсса чIумалгу жула дакIру ччучлан дикIай, Палестиннавусса жулва бусурмансса уссурвал ва ссурвал укунсса тагьардануву бушиву хъиннува кьурчIисса иш бур. ДухIин дусса инсаннаща къашайссар паракьатну икIан, къашайшалт, хъами, оьрчIру мукун цIими бакъасса аькьубалий чIалай. Къизгъинсса рахIму бакъашиврул лув лирчIун дур цимурца инсаншиву. Ттизаманнул технологиярдал, хьхьичIуншивурттал жучIанна анаварсса мутталий диян дуллай дур аьзиятралу ливчIсса Палестиннал халкьуннан хъанахъисса мусиватирттал суратру.

Ттул кулпат зий бур янин чани чансса оьрчIал школалий. Мукунна, шардагу дарсру дишай шаний утту бивхьунмасса, янин чани бакъасса душнихь. Гьарца кьини га бур цIуллу-сагъшиврул диялдакъашивуртту дусса оьр-чIаращал зий. Ганин чIалай бур цайминнахь бусса неъматирттая махIрумсса оьрчIру-душру. Кьининих мукунсса инсантурал дянивсса чIумал аьдат хьуну, дакI кьянкьа лагайссар тIун бикIай, амма ттула кулпат чIалай му иш мукун бакъашиву тасттикь хьунни. Бомбардал ппив бувсса азарханалийсса оьрчIал суратру ккаркукун хьхьувай шану къабиллай аьтIий бия. Мукунна хъювусулну дур жула дакIругу.

Ца базулийсса щавулул къювулул щалва чурх гьалак бувайсса кунма, Гъазалул къювулулгу щала инсаниятран асар биян буллай бур.

Жула дакI цIуцIавугу личIи-личIину ялун личай. Каних кумаг бан бюхълай бакъарив? Мукъуйну бан аьркинссар: дуаь дуллай, Заннайн лабизлай чIа учинну зулмукартурая ххассал баву.

Аллагьнайн лабизаву, дуаь даву – бусурманчунал ярагъри. ЦIана муния чIявусса гъалгъарду бур. ДакIнин бутанна, дуаь даву цурдагу Заннайнсса эбадат душиву. Жува чIа учинну, жаваб Заннал дулунтIиссар, му цукунсса жавабрив жунма кIулвагу къахьун бюхъайссар. Жула дакI марцIширул ва имандалул дуаь кьамул шаву анавар дуккан дувантIиссар. Мукунсса бур умуд.

Зулмулухсса, аьдлу бакъашиврухсса, оьбалардахсса танмихI ччяни бивну ччай бур, амма мукун къабикIай. Ссавур думиннан ва оьрмулул шинну нясивминнан ккаккантIиссар гьарцаманал цанма лайкьсса танмихI буллалисса куц. Аллагь Тааьланал мугьлат булайссар тавба дуван, пикри бувну тIайла бацIан.

Анавар мабуккари, оьбалалийн оьбала мабувари тIиминнайн сси бизлай буру жува. Мукунми нигьа буслай бур, хаинтал бур учин захIматсса иш бакъар. Аммарив чансса чIун ларгун махъ чIалан бикIай цалва сси канихьхьун лавсминнал увкумур бувнутIий дакьаву ва паракьатшиву дуруччин бювхъушиву. ЦIанасса тагьар захIматсса дур. ДакIру къювулул, сситтул ва оьхIалшиврул гьалак дурну дур. Жула пикрирду Палестиннаву бур. Дяъви къуртал шайния тIий дуаьрду дуллайнма буру. Щала дунияллий, хаснува та чIивисса аьрщарал касакрай дакьаву хьусса кьини ккакканнав. Амин.