Умматрал къюву
Умматрал къюву
Цимигу шинай нанисса къалмакъал уттигу гужлан хьунни, къия дирунни чIярусса хIукуматирттайн. Щала дунияллийсса халкь буруккинттарай бур, кьининих чIяву хъанахъисса ливтIуми ва щавурду дирми чIалай.
Вай иширттал дайдихьу хьуссар ттуршлийсса шинардил хьхьичIра, жугьутIиян цала хIукумат сакин дуван ччан бивкIун, Палестиннал аьрщарайн бизлан бивкIукун. ООН-далул кьамул дурссар Палестин хIукумат кIидачIлачIисса резолюция, байбивхьуссар аьрабнал ва жугьутIиял дянивсса дяъви ва мунил хъирив чIумуя чIумуйн ссивцIу гьаз хъанан бивкIссар. Тарихравун куртI къахьунну, му цумацаннангу кIулсса иш бурхьувкун.
ЦIанасса дяъвигу – цавайннан цала ватан ва тархъаншиву дуруччавур, вайминнан цIусса аьрщив кIунттихьхьун ласунсса хIарачатри. КIивагу чулуха литIлай бур инсантал, хаснува хъами ва мюрщисса оьрчIру. Азарахъул кулпатирттан цалва къатри кьабивтун лихъан багьунни.
ХIакьину Палестиннаву хъанахъисса ишру хъинну лавхьхьусса бур тарихраву хьуминнуха. ДакIнин бутияра 1099-ку шинал цалчинмур «крестовый поход» дурми Иерусалимрайн ххявхсса куц. Шагьру гайннал кIунттихь бивкIссар 1187-ку шинал СалахIуддин Аюбил тархъан баннин. Гайксса шиннардий Иерусалимрал лагмара диркIссар бусурманнал хIукуматру, амма шагьру тархъан баврин цукунчIавсса кумаг къавхьуссар, бусурманнаву цашиву къадиркIунутIий. СалахIуддиннул дурсса цалчинмур агьамсса даву – бусурман цачIун бувну, диндалийн ва элмулийн зана бивтун, гайннаву яла ххаллилми хасиятру тарбия дурссар.
ХIакьинугу бусурман хIукуматирттал дянив бунугу, личIи-личIисса кьюкьрайх бавчIусса Палестиннаща цавува цивппа цачIун хьун бюхълай бакъар. Циняв аьраб бунугу, бусурман диндалий бунугу, ца мазрай гъалгъа тIурчагу, ватан ца духьурчагу, тайннаща ца мукъуйн бучIан хъанай бакъар.
Пикри бувара, бачIвасса кIанттай сакин дурсса Израильнал хIукумат гьарца чулуха цуксса хьхьичIуннай хьуну дурив: загълунсса аьрал ва ярагъ ва элмийсса тIитIаларду дурну, сайки ядерный ярагъ буссар тIийгума бур. Ххал дара утти гайннал чIаравсса бусурман яхъанахъисса хIукуматирттавусса элмулул ва багьу-бизулул тагьар цукунсса дурив, тайннал жагьилтурал цукунсса умудру бурив ва оьрмулул даража цукунсса бурив? Палестинналгу лагмасса бусурманналгу хIакьинусса тагьарданул багьантту буссар вай суаллахьхьунсса жавабирдаву.
Мунияту, хIакьину оь экьибутIаву дацIан даву хъинну агьамссар. Заэвсса дунугу дакьаву шаврийн умуд бивхьуну, цачIун хьуну, ца мукъуйну баян буван аьркинссар чапхуншиву кьамул къадуллалишиву.
Дянив дичлачисса питначитурая мурахас хьун аьркинссар. Яттил бурчурду лавхсса барцIру бур бусурманнай цIими буллали мишан дурну, жува зана къабикIай ххуллийх гьан бувну, цинявннайн къаршисса дяъвилувун кIункIу бувансса кьастру дуллай. Миннал бяйкьин бувмигу чансса бакъар. Митингру дулланну, «джигьадрайн» букканну тIисса леххавурду гьарца чулуха най дур, амма тайннал пикри буллай бакъар цайнма вих хьуну питналувух хIала бувхми жанналуцIа баврихлу жаваб дулун багьантIишиву.
Аллагьнал жува циняв буруччиннав питна-балардая, мусиватирттая. Палестиннаву ливтIусса бусурман Алжаннул багъирдавун буххан нясивну лякъиннав!
Дуаьртту чIяру дувара, та къалмакъал ччясса мутталий къуртал шаву Заннахь чIа тIутIияра. Бусурман цала аьрщарай паракьатну яхъанан нясив баннав! Амин.
