НицIавкIратусса шайх Сайфуллагь-Кьадинал насихIатру
Заннал зунма нясив бувсса неъматирттайн щукрулий бикIи. Щукру баву – неъматру гьарза шаврил сававну шайссар.
Щак бакъа, хIакьну Заннайн эбадат даву – му Сунналул ххуллу бугьавури. Мунилли инсан цала гьавасрал лагъшиврула тархъан увайссар.
Вила шайхнал амрурду биттур бува, мунал увкумур вила пикрирдахун ва кIулшилухун бакьлай бакъахьурчагу. Цанчирча, мури вил дакIнил хIакин, мунан кIулссар вин къакIулмур.
Иман духьурча захIматшиву дакъассар, мютIишиву дакъахьурча бигьашиву дакъассар.
Аллагьнал ﷻ цIа кIицI лагаву – зикри – Зал кIул авричIан ияврил дуцин ва Аллагь ﷻ кIул уван яла гъанмур ххуллу, дакIурдин яла хъинмур аьмалну хъанахъиссар. Аллагь ﷻ кIицI лагавунияр лахъсса даража бакъассар. Панасса дунияллул кьимат бакъассар, инсаннал муних къулагас дулланссаксса. Вила напсилун ччимуния махъунай хьуну, Аллагь ﷻ кIицI лагаву гьарза дуллан аьркинссар. ЧIявуну Зал кIицI къалагларча, дакI марцI къашайссар. Дунияллул неъматирттава думуний гьашиву даву – бух къалагайсса ххазинари. Щищал-дунугу дусшиву дуллалиманайн ганаяту чара бакъа ххуйсса ягу оьккисса асар биянтIиссар. Бюхттулшиву (хъуншиву) зулмукаршивруцIун къадакьайссар, хIайп учаву рязишивруцIун къадакьайссар. Ца захIматшиврущал архIал кIира бигьашивугу дулайссар Аллагьнал.
Дунияллул лазатирттал хъирив агьманах ургаву заралссар, цанчирча мукун Аллагь ﷻ хъама итайссар. Пикрирдавун агьайсса инсаннан мяълумну бувчIинтIиссар гьарзад так Аллагьнал ﷻ ляхъан дурсса душиву. Заннал ляхъан бувсса махлукьатраву инсаннаяр бусравсса ва камилсса зад дакъассар. Аллагьнал ﷻ ххуллий ца кIапIикI харж дуван къаччиманал цала батIулшиннарал, аьвамшиврул ва ахIмакьшиврул цIаний чIярусса харжлугъ дувайссар. Миккун харж дуван му мяш къашайссар. ХIакьсса иман – инсаннал яла агьаммур хъусри.
