МарцIшивруясса хIадисру
Исламраву хъунмасса кIану бувгьуну бур инсаннал чурххал ва лагмасса тIабиаьтрал марцIшиву дуруччаврил. Гьарца шариаьтрал лу байбишайссар марцIшиву даврия бусласисса бутIуя. Диндалул ца тIалавшиннари чак, эбадат дувайсса кIану, янна ва чурх марцI баву.
Имандалул бутIа
Абу Маликлул бувсун бур МухIаммад Идавсил ﷺ увкусса махъру: «МарцIшиву – имандалул дачIир» (Муслим).
Сивак
ХIадисраву увкуну бур: «Ккарччайх сивак дулуккияра – мунил кьацI марцI бувайссар, Аллагь ﷻ рязи увайссар». (ан-Насаи)
Идавсил ﷺ увкуссар: «Умматиннан захIмат хьуншиву нигь дакъассания, гьарца чаклин биссайсса чIумал сивак ишла дувара учинтIиссия» (аль-Бухари, Муслим)
Чурххал марцIшиву
МухIаммад Идавсил ﷺ увкуну бур: «Ххюра зад инсаннал тIабиаьтраватур: аьвратрая чIарарду чартIи даву, суннат баву, ссилссилту кутIа даву, хъаралусса чIарарду риттаву ва михьру кьукьаву» (аль-Бухари, Муслим).
Нюжмар кьини
Абу Зарр аль-Гъифаринаясса хIадисраву бур: «Инсаннал нюжмар кьини чурхгу шювшуну, исвагьисса яннагу ларххун, тIааьнсса аьтрилул кьанкьгу дурну, мизитравун лавгун, гивугу инсантурал ялтту шару къаласлай, паракьатну цала чакру буллай, имамнал хутIба буккайнийгу чак бувну къуртал хьуннингу ихтилат къабуллай, – мунал кIира нюжмар кьинилул дянив бувсса бунагьру багъишла битантIиссар». (Ибн Мажагь).
Лагма-ялттусса марцIшиву
Муаьз ибн Жабаллул бувсун бур хIадис: «Шанма нааьнасса бунагьрая личIлулну бикIи: щин нанисса кIанттавун (щаращи), ххуллийн ва ххют дусса кIанттурдайн кIущин мабувару» (Муслим).
Имам Муслимлул луттиравусса хIадисраву куну бур: «Ххуллия дахчилачимур дукьавугу – цадакьари».
Къатлул марцIшиву
Идавсил ﷺ увкуссар: «Зула къатрал бухкIуллу ва хIаятру марцI дулувара» (Абу Давуд).
Юнус Расулов
