Бусурманчунал Аллагьнащалсса адабру
Бусурманчунал Аллагьнащалсса адабру
Гьарца муъминсса бусурманчунан кIулну бикIан аьркинссар цува шава икIу, сапарданий икIу, шанай икIу, чантI увкуну икIу, ивкIуну икIу, уттавану икIу, гьарца хIаллай цащала архIал икIайсса, тачIав личIи къашайсса, хIакьсса цала гьалмахчу, цува ляхъан увсса, цанма неъмат буллусса, цува балардая ххассал увайсса, ца цуванусса Аллагь ﷻ ушиву, мукунсса гьалмахчу му акъа цама акъассар.
Мунайн леххаву учирча – леххаврий уккайссар, дуаь дуварча – жаваб дулайссар. Му вил дакIний уссаксса – вил чIарав Мугу уссар. Му ина кIицI лавгтари Муналгу ина кIицI лагайссара. Аллагь Тааьла гьар цалва Мулки-малакутраву (ляхъан дурмуниву) кьарар хьусса, лухччиссавний сакин хьусса, халкьуннайн аьлтту уклакисса, миннал дакIнийн багьмур, чурххан ччан бивкIмур, янил, мазрал, канил, ччаннал, чурххал буллалимур – гьарца кьюлтIмургу, загьирмургу, мунан чIалачIиссар. Мунаяту кьюлтIну, кIучIну, кIул къавхьуну личIайсса зад цичIав бакъассар. Му вин къачIаларчагу, Мунан инагу, вил ишругу чIалачIиссар.
Аллагьнащалсса адабругу цири учирча, Му бюхъайссаксса дакIния уккан къаитавури. Мазрал кIицI лаглайна икIавури. Мунал кьудратирттая, хIикматирттая, хъуншивруя, неъматирттая пикри буллайна икIавури. ХIатта нахIусса дукра дукайни, ххуйсса янна лаххайни, щарссаничIа утту ишайни, тааьнсса хIачIия хIачIайни, нацIусса ахъулсса дукайни, ми кунмасса цайми неъматирттаяту тIааьн ласласиний Аллагьнаяту ﷻ гъапулну къаикIавури. Аллагьнаяту гъапул шаву, хъама итаву, дакIнин къаутлатаву – бунагьирттал хъуниминнуятури. Мунал фазлулийн, рахIмулийн, аьфвулийн, неъматрайн, алжаннуйн хьулданий бикIан аьркинссар. Цува цуксса оьсса, оьккисса, фасикьсса (бунагьсса) аьмаллу буллалисса ухьурчагу, мунал аьфвулий хьул къакьукьавури. Цува цуксса хъинсса тIааьт-эбадат дуллалисса ухьурчагу, миннуйн чул къабивщуну, Аллагьнал ﷻ цIимилийн чул бищавури. Гьарца ишираву нигьал ва хьулданул дянив икIавури. Ца я Заннал аькьубалух, ца я Заннал цIимилух буруглай битавури. Ца дунияллух – ца ахиратлух, ца алжаннух – ца дужжагьрах буруглаги бавури. Ца ша дунияллий, ца ша ахиратлуву бивзун икIавури. НахIакьсса, мюнпат бакъасса каламрая (ихтилатрая) кьаагьну икIавури. Хъинмунийн амру буллай, оьмуния нагьий (байщун) буллай икIавури.
Пикрилий лазимну икIавури, неъматрайн щукрулий икIавури, бала-апатIрачIа ссавурданий икIавури. Аллагьнаха ﷻ санаъ дуллай, таваккул Заннайн бувтун икIавури, бивкIулух къаралданий икIавури. ХIатта, гьарца чIумал Заннал бува увкумур буллай, мабувара увкумур къабуллай, Аллагь рязи хьунмур буллай, сси бизанмур къабуллай икIавури. ХIакьсса Аллагьнал ﷻ лагьнал пиша мури. Мукун гьан буван аьркинссар оьрму. Гьарца чIумал мукун икIан къахьурчагу, кьинилуву цал-кIийла-шамийла Аллагь ﷻ дакIнийн увтун, мунащал мунажат дуван, пикри буван аьркинссар, цащава хьусса бунагь-хатIалия пашман хьуну, хъинну дакIгу гъагъан дурну щяивкIун. Му чIумал мунал гьалмахчуну Аллагьри ﷻ икIантIисса.
«НасихIатуль аьвам»
