ХIадисуль-кьудси
Аллагь Тааьланал увкуну бур: «Я Адамлул арс! На махIаттал хъанай ура цува ивчIантIишиву кIулну бунува ххари хъанахъисса инсанная; хIисаб-суал бувантIишиву дакI дарцIуну унува, хъус цачIун дуллалиманая; махIатталну ура цахра гьав ялугьлай душиву кIулну бунува хъяхъиманая. На махIатталну ура Кьиямасса кьини дучIантIишиву кIулну бунува баччибакъашиву дувайманая; махIатталну ура ва дунияллийсса оьрму кутIасса бушиву кIулну бунува паракьатманая. На махIатталну ура элму-кIулши дакIниву дакъасса, так мазрай дусса инсанная; махIатталну ура цала чурх щинай марцI буллай, амма дакI чапалманая. На махIатталну ура цайминнал диялдакъашивуртталсса буллай, цала дакIнил диялдакъашивурттах къулагъас къадувайманая; Аллагь ﷻ цахва урувгун ушиву кIулну бунува, мютIий къашайманая; махIатталну ура ва дунияллия цувалу гьантIишиву, гьаттавун цувалу уххантIишиву, ахиратлуву хIисаб цалалу дулунтIишиву кIулну бунува халкьуннаву ххаришиврух луглагиманая. ХIакьну, На акъа цама зал акъассар, МухIаммадгу ﷺ ттул лагъри ва илчири».
Аллагь Тааьла тIий ур: «Я Адамлул арс! Чанмуний гьашиву дува – ссахчIав мюхтажшиву къадикIантIиссар; хIусудшивруя дакI марцI дува – паракьатну икIантIиссара; хIараммуния арх хьу – вил дин, иман дакIнихтунусса дикIантIиссар. Гъибат баву кьадиртма Ттун ххира хьунтIиссар; халкьунная арх уцайма миннаясса балардая мурахас хьунтIиссар; ихтилат чансса бувайманал аькьлу камил хьунтIиссар; чанмуний гьашиву дувайма – Аллагьнайн ﷻ таваккал дурмари.
Я Адамлул арс! Зува Аллагьнал лагътал бушиву тасттикьгу бувну, яла мютIий бакъа бикIан цукун шай? Зу буру бивкIу мяйжанссар тIий, амма зун му къаххирар. Зунма къакIулмургу увкуну, зу буру му ялттурасса, бунагь бакъасса тIул ххай, амма Аллагьнал ﷻ хьхьичI му хъунмасса бунагьри».
