МухIаммад Идавсил ﷺ диндалул ххирашиву

МухIаммад Идавсил ﷺ диндалул ххирашиву

Циняв идавстурал диннаву яла ххирамур, хъинмур ва жула МухIаммад Идавсил ﷺ динни. Мунияр ххирасса, даража лавайсса, чири хъунмасса, цIакъсса, мюхчансса дин царагу къадиркIссар. Мунияр чIярусса, машгьурсса, чIявусса халкъуннал дургьусса дингу дакъассар. Муних бурувгун цайми динну дурагу дакъасса куннассар.

Му диндалул халкъ бакъасса кIану дунияллий чанссар. Гьар куллу дунияллий, зунттаву, ардаву, авлахъирттай, хьхьирирдал жазирардай, халкъ бумуний, бакъамуний, чапуртурал билаятирттай, арулвагу акимирттай, мунил агьлу буссар. ХIасил гьарца дунияллийсса паччахIтурал канихь, миннал билаятирттай, му диндалул агьлу бакъасса нажагь бакъассар. Щалла лухччи мунийнур ххуй дурсса. Му загьир хьувкун, мунил цимурца цайми диннугу насху дурссар. Мурив ахирзаман букканнин насху къахьунтIиссар.

Эса идавс ливккукунгу, Магьди имам увккукунгу, минналгу му динни дуллантIисса. Му ларай хьурча дакъа, яларай къахьунтIиссар. Му диндалул инсан нажагьгу му кьадиртун, муртад хьуну цамур диндалийн къалагайссар, ванивусса нурданул барачатрайну. Мугу Расулуллагьнал ﷺ барачатри. Муниву чIярусса ххира-ххирасса тIуллу-тIабиаьтругу дуссар. Миннийну мунил агьлу бяйкьаву, ялавай шаву къадикIайссар. ХIасил, МухIаммадлул ﷺ дин Аллагь ТааьланачIа хъинну ххирасса, ххуйсса, лавайсса ляълужавгьарди, ттеркъукъи-якъутри.

Аллагьнал ﷻ илагьийсса ихIсанни, сиррийсса асрарди, МухIаммадлун ﷺ гьан бувсса гьадиятри, мунал умматрансса зияфатри. Мунищал бара-бар шайсса зад я ссавруннал малакутрай, я лухччинул тIабакьатирттай дакъассар. Мунийнур инсан дунияллулгу ахиратлулгу макьаматирттайн иллалисса. Му дингу мукун ххира дурссар, яла Аллагьу Тааьланал МухIаммадлул ﷺ умматиннаятусса цалва муъминсса лагъартуннал дакIурдиву дирхьуну, мунийну ми личIину ххира бувну, хъун бувну, бюхттулгу бувссар. Яла цала ххираману увсса, хъунасса Идавс МухIаммад ﷺ васитIалийну, му тIайла увну кIулгу дурссар.

«НасихIатуль аьвам» («ГьунчIукьатIан»)