Аллагьнал ﷻ нясив бувмуния рязишиву ва щаллуну мютIи шаву – эбадатрал лаваймур даража
Аллагьнал ﷻ винна нясив дурсса чичрулий рязину икIаву ва щаллуну мютIий шаву (таслим) – Заннал хьхьичI лагъшиву даврил (эбадат) яла лахъмур даражану хъанахъиссар. Ми кIира хасиятраву: мютIишивруву ва вила циняв иширттаву Заннайн таваккал бутавриву дуссар Исламрал камилшиву.
ДакIниву хIакьсса мютIишиву дусса инсаннайн сайки иблислуйн куннасса нааьна диярчагу, му чIумалгу цала кьадарданий, имандалий ва Исламрай рязину икIантIиссар. Мунияту, дакIнихтуну эбадат дуллалима цалва аьмаллая акъача, Аллагьнал ﷻ хIукмурдая ва чичрулия рязину уссар. Масала, тIааьн бакъасса иширавун агьсса ссятраву, дакIниву чанссавагу буруккин сукку хьусса чIумалгу му цала напсилул лагъну ккалиссар. Цукунсса тагьардануву ухьурчагу (рахIатсса ягу тIааьн дакъасса) личIишиву дакъама – мяйжаннугу цала Заннайн мютIи хьусса лагъри. Мури гьарца тIулданул мархха ва гьану. Мунияту, Аллагьнал ﷻ ххуллийн увкманан аьркинссар мудан Заннал лагъну икIан, цанчирча Аллагь Тааьла мудан вил Зал унутIий. Мунил хIакьираву гай ххуттардиву бюхханну чивчуну бур: Аьй-бювкьу, цIа даву… личIи дулларча, Къанчрайн икрам байманаха лахьхьинтIиссара. Ялув чивчумур хъанахъиссар циняв тIарикьатирдал бюхттулсса шайхтурал тасттикь бувсса аслу-гьану.
Ца чIумал имам Шяъранил цIувххуссар цала усттаз Аьли ал-Хаваслухь: «Мискинтурал хIакьираву ци бувну хъинссар: чумартшиву дурну гайннан цадакьа буллуну хъинссарив ягу гай га тагьарданий бикIан нясив бувсса Заннал чулухуннай адав дурну бусса куццуй кьабитарча хъиннив?» Аьли ал-Хаваслул укунсса жаваб дуллуссар: «Ттухь цIуххирча, адав дурну хъинни. Аллагь Тааьланал ца инсаннан мискинну икIан нясив бувсса чIумал, мунивугу Заннал хIикматшиву ва куртIсса мяъна дуссар. Аллагьнан ﷻ аьламравусса цимурца баяйссар, мунияту Заннайн хIурматадав булува, Заннал ляхъан дурмур цала тагьарданий кьадити. Аллагьнал ﷻ чулуха ашкарасса ихтияр дакъанура гайннал тагьар даххана дувансса хIарачат мабувара, цанчирча, му бюхъайссар вил чулухасса адав дакъашивуну хьун, мискинну икIан нясив бувсса инсан авадан уван хIарачат буллай.
Му чIумал му лагънал кьисмат вийн лахъан бюхъайссар, винна ххирамур, инава рязимур зерххуну, къаххирамур, рязи акъамур дуллуну. Вин га мискинчувнал хIал баххана буван ччай бивкIсса кунма, вила хIалгу баххана хьун бюхъайссар. Аллагьнал ﷻ ина багъишла ивтун мукунсса танмихI къабуварча, мукун ялтту учIаву вин хIисаврагу къархьусса хIиллану лякъин бюхъайссар. ХIасил, рувхIанийсса пасатшиннаравун багьминнащал инагу агьантIиссара.
«СалихIминнал тIабиаьт»
