Аллагьнал ﷻ хьхьичI лагъшиву даврил хIасил

Инава заэвсса ушиву мукIру хьу – му чIумал Аллагьнал ﷻ Цала гужрайну ва кьудратрайну вин кумаг бувантIиссар, инава мискинсса, мюхтажсса ушиву мукIру хьу – Аллагьнал ﷻ вин Цала давлатрайну кумаг бувантIиссар. Цанчирча, дакIниву Аллагьнах ﷻ мюхтажшиву думанан ва му хасият ялун личин дуллалиманан дириянтIиссар яла бюхттулмур хъус-неъмат – Ца Аллагь ﷻ личIаннин ссахчIав ва щихчIав мюхтаж къашаву.

Лагънан цамур ххасалшиву ва уххансса кIану бакъассар, так Бюхттулса ЗанначIа бакъа. Аллагьнал ﷻ хьхьичIсса лагъшиврул (оьбудийя) лишанну дусса инсаннан Заннал ﷻ кабакьайссар Цала Хъуншиврийну (рубубийя), хаснува, лагъ мудан Аллагь ﷻ кIицI лаглай (зикр) ухьурча. Аллагь ﷻ кIицI лагайманачIан макьнатIисрал кунна кIункIу шайссар Заннал хIакьсса лагънал хасиятру.

Инсаннан дакIнихтуну ччан бикIарча Заннал лагънал цIа цанна ласун, Аллагьнал ﷻ щак бакъа мунан кумаг бувантIиссар Цала кьудратрайну. Му чIумал лагънан кIул хьунтIиссар цачIанмасса Аллагьнал ﷻ цIими – му Заннал кумаграл дахьва чIивисса бутIари. Цанчирча, лагъшиву, пакьиршиву ва Аллагьнайн ﷻ мюхтажшиву аьям дуллан хIарачат бувайманан Заннал ﷻ Цала неъматру ччяни булунтIиссар. Мунияту, Заннал ﷻ неъматру цайнма ччяни бивну ччима мукIру хьун аьркинссар цува Аллагьнах ﷻ мюхтажсса ушиву. Аллагь Тааьланал увкуну бур Кьуръандалуву (мяъна): «Цадакьа – мюхтажминнан» («АтТавба» суралул 60-мур аят). Цамур куццуй учин, рувхIанийсса камилшиврийн бивминнан Аллагьнал ﷻ чIявусса неъматру буллалиссаксса, муксса гужлан шайссар миннал лагъшиву. Миннал дакIурдиву иман цIакь хъанахъиссаксса, муксса ми гъан шайссар АллагьначIан. Миннал бюхттулшиву ва сий хъун хъанахъиссаксса, гуж шайссар дакIурдивусса хIалимшиву. Му хIалимшиву ялун личайссар бусурманнал хьхьичIсса иминшивруву ва мяйжансса хъуншивруву, диндакъултраяр лахъшивруву.

РувхIанийсса камилшиврул лахъсса даражалийн ивманал цала нафсиран ччан диркIсса зад дукарча, нафс мунайн барчаллагьрай бикIайссар. Цанчирча, салихIинтуралгу чIун-чIумух дукайссар нафсиран ччан диркIмур. Миннан нафсру мюрщисса оьрчIаха лавхьхьуссар – аякьалий ва цIимилий битан ва цал-цал бахшишру дуллан аьркинсса. Цамур чIумал мукунсса инсантурал цала нафсру махIрум бувайссар, идавстурал насихIатру биттур бувну, дунияллул лазатру цанма ссуссукьу буллай.

«САЛИХIМИННАЛ ТIАБИАЬТ»

ТIИССА ЛУТТИРАВА