Бусаларду
Бусаларду
Бунагьирттая тавба
Ци-бунугу ца масалалуву захIматшивуртту хъанан диркIукун, имам Абу ХIанифал цала мутааьлимталгу бавтIун учайсса бивкIун бур: «Ва иширавусса захIматшиврул савав – на бувсса бунагьрури». Яла имамнал тавба дувайсса диркIун дур. Ганал аьдат диркIун дур, цал чаклингу ивссуну, тавбалул чакгу бувну, Аллагьнахь ﷺ цува багъишла ити увкуну, дуаь дувайсса. Мунияр махъ захIматсса ишругу бигьа шайсса бивкIун бур, имамналгу учайсса бивкIун бур: «На Заннахь ттула бунагьру багъишла битаву чIа учав, Аллагьнал ﷻ ттуй цIими бивхьунни, ва захIматсса иширава уккансса ххуллугу ккаккан бувунни».
Имамнал дуаь
Ца чIумал ХIусайннул арс Аьли ивкIун ур чакливу имамшиву дуллай. «АлхIамрал» хъирив мунал бувккуну бур «Залзала» тIисса Кьуръандалул сура. Муниву бувсун буссар гьарца инсаннан ахиратраву лякьинтIишиву цала бувмур – ххуймур ва оьккимур, цуксса чIивисса буварчагу. Му чаклил жяматраву ивкIун ур Абу ХIанифагу. Чак бувну махъ циняв халкь лавгун бур, амма Абу ХIанифа гиккува щяивкIун, ахиратрал пикрирдавун агьну ивкIун ур. Аьли буслай ивкIун ур: «Ттун бувчIуна имам куртIсса пикрирдавун лавгун ушиву. Ганал чIарав чирахъгу бивхьуну, на шавай лавгссияв. Гьунттимур кьини на мизитравун кIюрххил чаклийн увкIссияв. Имам Абу ХIанифа ия каругу гьаз дурну укунсса дуаь дуллай: «Я Аллагь, цуксса чIивисса бунугу хъинбала ягу оьбала бувманан Ина багьайсса ужра булунтIий ура. Вила заэвсса лагъ дуржагьрал танмихIрая, бунагьирттая уручча, ттуй цIими биша». На хIисав хьувкун, имамнал цIувххуна: «Ина вила чирахъ махъунмай ласун увкIрав?» На учав: «ХIурмат лавайсса имам, хьхьу ларгунни, кIюрххил чаклил чIун дуркIунни». Яла Абу ХIанифа цайна цува увкIсса куна, ивзун, суннат-чаклил кIира ракааьтгу дурну, махъунай щяивкIуна. Мизитравун халкь бавтIукун, имамнал гайннащал жяматрай кIюрххил чак бувуна. Абу ХIанифал кIюрххил чак бувуна лахьхьура хъатIан чаклийн дурсса иссаврищал».
