Ватандалухасса назмурду

 Ватандалухасса назмурду

Нюжмар дуван ччива мащилул ардай…

ЧантI учин ччива ттун ца кьини кIюрххил,

СсурхIиял дазуцIсса магьлул мащилий,

Оьллугу ттивзуну дуркIсса бутталссил,

Гъили накIлил оьрту чIарав бишайний.

Дюхлулул ках тIисса чIапIал щурщулий,

«НакIлия ххув уча!» миннат бувайний,

Аьтрилул аьнттуву ладиркI мащилий,

Телефонну, сетьру, вай-фай дакъаний.

Зунзулчаннал тIинтту зунттал ланттая

Хьхьем датIлай хIаллицIух ланцIа тIутIиний,

Бизанттай, рахIаву, ратIув, лагмава

ЧIелмултрал хор дакъа чIу-чIитI бакъаний.

Щюллисса хьхьемаву ччаннугу шюшлай,

Паммалул ттуруллал хъирив хъанайний,

Нюжмар дуван ччива мащилул ардай

Мурчайн лажин дугьлай, бизанттайн лахълай.

Бизанттайн лахъайхту лихъайхха дардру,

Уртту-тIутIай чIалай оьрчIи бузмарду,

ШанчIапIал щатIава бакIру гьаз дурну,

НякIсса чани кIучIай някIуннаралгу.

Бургъищал, цIурттащал хаварду буслай,

ЧIимучIалт хъачIунттай щябикIан битлай,

Ца нюжмар дан ччива мащилул ардай,

Илкиншиврул чухъа ликъаклай занай!

ПатIимат Рамазанова

Ттун лащай жула лак…

Ттун лащай жула лак кIяла тIутIуха,

ЦIанну чIалачIисса лахъсса луххаха,

ТIутIал дурцIу арив тийннайну ххярхсса,

Магъмунсса, иминсса, лащин личIийсса.

ГьантIиссар вай чIунну, баргъ битантIиссар,

ТIутIи чантI чинтIиссар бургъил нурданул.

Лах паракьат хьуну щябикIантIиссар,

Ялар чIалантIисса кIялан ардарав.

Жула лакрал миллат сукку хьунтIиссар,

Яла лахъмур зунттуйн цив лахъантIиссар.

Цинявннан чIаланний цив бацIантIиссар,

Цаламий гьунарду хьхьичI бишинтIиссар.

Цакуццуй га кIанай лап щурунтIиссар,

Дуниял махIаттал цакун дантIиссар.

Цинявппа ца чIуний мукIру хьунтIиссар

Аькьлулул лавайми лакри чинтIиссар.

Зарета Мусаева