Ссайгъатру баврия
Цаннал цаннан укра зад дулаву, ссайгъат баву ссуннатссар, Аллагьнал ﷻ ххуллий, Аллагь ﷻ рязи уван дуллай ухьурча. Му дулайнигу «на ва хъус вин укра дулав», – куну дулайманал учин аьркинссар. «Нагу кьамул дурссар», - куну, ласайманалгу учин аьркинссар. Мукун къакуну, ссихI къадурккуну дулаврийну заллу къашайссар.
Укра дуллуну цама заллу увсса хъусгу кIилчин дула куну махъуннай ласунгу ихтияр дакъассар, так нитти-буттал цалва оьрчIан укра дуллусса хъус дакъасса. Миннахь ихтияр дуссар махъуннай ласун, му цурдагу духьурча харж къадурну, цаманан къадуллуну. Мукунна ихтияр дуссар буттал бутталгу, ниттил ниттилгу цалва оьрчIал оьрчIан дуллумур зана дувангу.
Цаннал цанначIан ссайгъатран зад гьан давугу ссуннатссар. Муналгу му ссайгъат кьамул баву ссуннатссар. ХIатта, чапурчунал гьан бувну бучIарчагу, кьамул къабувну махъунмай кIура баян баву хIарамссар.
ХIалалсса ххуллий ссайгъатран дуркIсса зад цаманан даххавугу къахъинссар, цалва мюнпат ласаву хъинссар. Дукайсса зад духьурча, мунияту чIаравминнан дулавугу хъинссар.
МарцIсса ниятрай къабуллуну, ца хIисаврай, цанма хъинбала тIалав буллай, ягу аьркиншиву барт дигьиншиврул гьан бувсса ссай-гъат бухьурча, ганал мурад барт бигьин къахьурча, му чIумал ссайгъат махъунмай кIура баян буван аьркинссар. Хаснува, ца къуллугърал залунначIан, хIакимначIан ссайгъат бучIарча, лулттурасса хIисаврай, цалва иширах урганшиврул, мунан му кьамул буванмагу къабучIиссар.
«ГьунчIукьатIан»
