Ласнал ва щарссанил буржру
Ласнал ва щарссанил буржру
Аллагь Тааьланал арамтуран неъмат камил буван дунияллул маэшатрал сававругу дазин, цаятувасса хъамигу ляхъан бувссар. ХьхьичIра-хьхьичI Адамлул линсирая ХIава ляхъан бувну, цанма щарнугу буллуну, яла минная махъмийгу ляхъан бувну, миннал дянив ччаву-нахIушивугу хьун дурссар кунначIа кув буруччин, цайми хIайвантру кунма низам дакъа къабивтун.
Ласнай ялувссар цала хъаралун щарсса дуркIукун, хьхьичIва-хьхьичI му ядуван, дуруччин, мунин дуканмур, лахханмур дуллуну, къатта буллуну. ХIатта, мунил учирча цинмалусса къатта була, даву къадуванна, дукра къашахьанна, куну, шариаьтрал ххуллий мунин цинмалусса къатта, шархьун дукра, дурурххуну янна дулун аьркинссар. Цурда рязину духьурча дакъа ласнал къатлуву даву дангу ялув бакъассар.
Ва заманнул аьдатрив – цачIугу канай, давугу дуллалаву дур. Щарсса уттисса аьдатрай кунна ласнащал хIала-ккалану духьурча дукавриву, лаххавриву хъинну исвагьишиву дурну, мунин ччимур дукансса дуллай ччикун янна дуллай, цинна ччикун ядуллалавугу къахъинссар. Хъиннура къуманугу къадитанссар. Цала тагьарданух урувгуну щаллуну ядуванссар.
Мукьва гьантлий цал, ягу нюжмардий цаллагу дикI-зад ларсуну дукавугу лайкьссар.
Дукралул, ичIаллил давриву, дулавриву, иширттаву ихтияр дулавугу хъинссар щарссанихьхьун, пикри бусса, иш кIулсса духьурча. Мукун ихтияр дулурча, дакI хIалану, нахIуну дикIайссар. Мунингу мукун ихтияр дуллукун ласнахь къацувххуна мунал хъуслияту чIа тIинан цадакьа буван бучIиссар, исрапшиву къадурну дулурча. Щарссанин дулайсса лаххиягу хIалалмунияту дакъа дулун къабучIиссар. Цалла ххуйсса дуркуну мунин оьккисса дулунгу къабучIиссар. Амма, цинна ччийкун, ччимур канай, ччимур лахлай, ччи-ччиних занай, ччиманащал ихтилатру, махсара–хъярчру буллай, цимурцаннул хьхьури цихьхьунна дуллуну, ччимур буллай къадитанссар. Мукун хьхьури цихьхьунна дуллуну итадакьирча хъами ччяни хъяврин шайссар. ЧIивимунил хъунмунийнгу кIункIу бувайссар, оьккишиврувун багьайссар.
Щарссанин мютIийсса, мунил тIи-тIимур буллалисса ласнаву журрат (адиминашиву, чувшиву) къадикIайссар. Му адимина чулийнгу къауккайссар. Цалла журрат душивугу, цахьра каши душивугу чIалачIи дуван аьркинссар, ласналли щарсса дугьайсса. Амма, гьарца даймуниву, дитаймуниву, ичIаллил, хъуслил, даврил иширттаву щарссанищал маслихIат ккаккаву, мунихь цIуххаву хъинссар, амма хIукму цалва буванссар.
Яла ласнай ялувссар щарссанин гьарца дунияллул, диндалул хIукмурду кIул буван. ХIалал-хIараммур, чаклилсса, зумалулсса, чак личIайсса чIумалсса, чурх шюшаврилсса, гьарца зад лахьхьин буван. Къабуварча, бунагьралун агьайссар. Мунийгу цинма къакIулмур мунахь цIуххин ялувссар. Цува къакIулну ухьурчагу кIулнахь цIувххуну мунин кIул буван ялувссар. Къабуварча, Кьиямасса кьини циван кIул къабав куну, суал бувантIиссар.
Яла ялувссар ласнай щарссанищал авкьуну, тIабиаьт дакьин дурну, нахIуну икIан, мунилмур тIабиаьт-аьмал оьшиврух къаурувгун му дуруччин аьркинссар. Хъаннил аькьлу чанссар, сси чIяруссар, махъ оьккиссар. Я нигьайну, я мазрайну буруччин аьркинссар. ХIатта Расулуллагьнал ﷺ хъаннилгума мунащал лажиннарайн бацIаву дуллай бивкIссар. Щарссанил тIабиаьт дурурччуну, мунил оьккисса мукъуй ссавур дурссаксса, АллагьначIа ﷻ даража хъунмассар.
ХIасил, щарсса бавккусса линсирая ляхъан дурну духьукун, тIайла бацIан булларча гъагъайссар. Бавккунма мюнпат ласурча бакъа, тIайла дацIан дуллай дуван къахьунтIиссар.
Ялагу ялувссар ласнай щарссанищал хъярч-махсара баву, канил бикIу, мазрал бикIу, га тирх учин дуван, рязи дуван. Мукун къадулларча, мунил тIабиаьт даккайссар, оь дикIайссар. Булларча ччаву дагьайссар, ччан шайссар, тIайлану, нахIуну дикIайссар. ХIатта Расулуллагьгума ﷺ Аьйшатлущал ччалли лечлай, хъярч буллай икIайва тIар. Щарссанил къаччимишан дулларчагу, хъинну ччиссар хъярч-махсара. Амма хъиннува чIявусса, оьккисса, шариаьтрацIун къабавкьусса махсартту бавугу къалайкьссар. Бувагу къабуллай, дакI дургьуну икIавугу хъинмагу бакъассар, къатлуву барачат къабикIайссар. Тяхъяну, нахIуну икIавриву барачат хъунмассар.
Ласнайн мютIи дакъа, мунал тIимур къабуллай щарсса ххарххунгу, цал нахIуну насихIат бусайссар. дакьил къахьурча чанкьанну нигь дулайссар, ягу шанучIа утту къаихьлай ацIайссар тIайла дацIаннин. Ялагу мютIи къахьурча, нигьайну танмихI бувайссар.
Лас ва щарнил цаннал тIабиаьт цаннал къаласлай, цаннан ца къаччай, няхIушиву дакъа, даин ххахлай, къалмакъаллу хъанан диркIукун, имамнал ца адимина ласнал чулуха ца щарссанил чулуха – кIия адимина дянив утайссар, миннал иширттах бурувгун, миннал дянив маслихIат буван. Ми кIиннавату яла бювкьу-багьана цума урив ххал увну, оьккири, аьйри куну вяъза-насихIатрайну маслихIат бувну, бюхъавай цачIун хьунмур бувайссар. Къабюхълай бухьурча, личIи шавриву маслихIатшиву духьурча, личIи бувайссар цIа рутан дурну.
Ласнай кунмасса буржру щарссанийгу буссар. Муний хъиннува ялувссар мий тIайла буккан. Аллагьнал ﷻ хьхьичIсса фариза гьарца инсаннан тIайла буккан ялувсса кунма, ласнал хьхьичIсса буржругу тIайла буккан ялувссар. ХIатта ласнал хьхьичIсса бурж тIайла бувккун, мунал мурад барт бивгьукун бакъа Аллагьнал ﷻ хьхьичIмур щаллу къахьунтIиссар.
Кьиямасса къини хьхьичIва-хьхьичI щарссанихь суал бантIиссар чаклияту, яла ласнайн мютIишивруяту. Сайки лас рязий акъа щарссанил суннат-зума дугьан къабучIиссар.
Щарссаний ялувсса буржругу: хьхьичIва-хьхьичI му ласнан ччисса куццуй, мунан ччан бивкIтари мунахьхьун цилва чурх булун ялувссар. Му рязисса куццуй, мунащал хъярч-махсара бувангу ялувссар. ХIатта, мунин хьхьувай лас утту къаивхьуну, му шанай къаивкIун утту дишин, шанан къабучIиссар. Гьарца хьхьуну ласнал чIарах утту дишаван аьркинссар. Мунангу ччай дуна ххарххуну, хиянатшиву дурну, личIийну утту дирхьусса щарссанин кьюрхилнин малаиктурал нааьна дуллай бикIайссар. Оьсса аьзаврайгу лайкь шайссар. Ласнан ччарча янна ххуйсса ларххун, нахIу къанкь дурну, мунан ххуй дизанну чIюлу хьун аьркинссар. Хаснува къатIату увкIсса чIумал марцIну ххуйну дикIаван багьайссар.
Ласнал лажиннарайн дарцIуну, мунах оьккисса калам къабувайссар. Мунаяр чIу лахъ къабувайссар. Жуав нахIусса дуллайссар, мунан къаччимур цичIаввагу къабувайссар. ХIатта, му рязи акъа бухкIуллул кьатIув къадуккайссар. Дуккарча кIурадаянцIа, ягу тавба дуванцIа муниха малаиктурал нааьна дуллай бикIайссар. Чара бакъа гьан багьарча, арамтал бакъасса ххуллийх лагайссар. Мунан къаччинахь зума дакъан къабучIиссар. Щищал духьурчагу ихтилатру буллай, махсара-хъярчру буллай, щурщурду буллай, ча-дунугу арамтуравух занан къабучIиссар. Хъаннива яла хъинмур – цурда арамтуран ххал къашаймурди, цинма арамталгу ххал къашаймурди. Ласнал къатлува, му рязи къахьунсса чулухуннай зад дулун къабучIиссар. Дулурча, чири ласнан, бунагь щарссанин бикIайссар. Мунал къаттагу, хъусгу, цилва чурхгу бурувччуну дикIан ялувссар, ссавучIав мунан хиянатшиву къадурну, хаснува му кьатувсса чIумал. Цурда ххуйсса дура куну, хъус дусса дура куну, ляхъин бусса дура куну, пахру бувну, лас дакъасса ур куну кьюкьин уван къабучIиссар. Ласнал гьарца иширай, ду-дакъашиврий ссавур дурну, мунал тIабиаьтгу дурурччуну, му рязисса куццуй дикIан аьркинссар. Ласнал къатлуву лас рязийсса хIалалсса касму давугу суннатссар, цурдагу рязину духьурча. ДаймуницIун кумаг бувну, къатта бавхьуну, чирахъ лавхъун, дукансса дурну, щинал бувцIуну, чаклин иссун щин дуллуну, тIяс бивхьуну, чаклилунсса дуртун, янна дурурххуну, дакьин дурну, шюршюну хъинссар. ХIатта, ласнал янна шюршюну, лаххан дуллукун, щарссанин азарда хъиншиврул чири чичайссар. Ласнал чурххай лаххансса чухъа дурсса щарссанин гъазават бувсса гъазинануксса чири буссар.
Мунил канихь гьанагьи дурсса зукка гъазинал канихьсса ярагъраха лархьхьуссар. Щарссанил гъазават – ласнал тIабиаьт дурурччуну, мунал зараллай ссавур давури. Аллагьнал ﷻ цийва ялув бивхьусса фаризарттугу дурусну тIайла буккайсса, оьккисса, хIарамсса задраяту чурхгу бурувччусса, ласнайн мютIийну, мунал амрулийгу дарцIусса, тIабиаьтгу ххуйсса, марцIсса, салихIсса щарсса АллагьначIа ﷻ азара салихIсса адиминаяр хъинссар. Мукунса щарсса Алжаннаву хIурулэнтуращал, му циятува рязисса ласнал щарссанугу дикIантIиссар.
ХIасил, гьарца чIумал – жагьилний икIу хъунавхьуний икIу, сагъний икIу, къашавайний икIу – ласнал хIурматрай дарцIуну, му рязи уллай дикIан ялувссар. Лас учIайхту лувату дирзун, му щяикIан дацIаву ххуйссар. Хаснува сапардания зана хьуний хьхьичIун дурккун, мунах авурав куну, яхши-хаш баву лайкьссар. Мунаха кунма, мунал нитти-буттаха, мунан ччиманаха къуллугъ бавугу лайкьссар. Мунащалгу, мунал чIаххуращалгу нахIуну, хIалимну дикIаву ххуйссар. ХIатта инсантурал цаннал цаннайн сужда буван ихтияр дуссания, хьхьичIва-хьхьичI щарссанихь ласнайн сужда бува куну амру бувантIиссия.
