ОьрчIру нач шайсса бухьурча...
Нитти-буттал ччаву, ххира-ххуй баву, нахIусса ихтилат – мюрщисса оьрчIан чара бакъа аьркинссар. Миннуясса асар хъунмассар ххирасса бахшишру пишкаш давунияр. ОьрчI нач шайсса, хIала уххан анавар къауккайсса ухьурча, лув чирчусса маслихIатру ишла бувара.
• ОьрчIан тачIав дакIнин мабутари цува нач шайсса ушиву.
• Мунал начсса хасият цайминнал хьхьичI ашкара мадувари.
• ОьрчI чансса цаярва мюрщиминнащал аьлахълан итларча, мунан лахьхьинтIиссар хIучI дакъа къуццу буллан.
• Цаярва мюрщиминнащал тIуркIу тIунсса гъира бусса оьрчIругу кьякьлухун мабихьларди.
• Инсантурал хьхьичI оьрчI ламусравун агьансса ишру хьун мабитари.
• ОьрчIал дакI кьянкьа хьунсса бакъа махъ маучари. Мунахь: «Ттун кIулли вища хьуншиву», «Жу дакI дарцIуну буру ина ва даву дувантIишиву», – увкуну хъинссар.
• Аьй-бювкьу дуллалисса, оькки уллалисса махъру маучари.
• Зула оьрчIал дустурайн ччя-ччяни хъамалу оьвтIутIи.
• Зула оьрчI цайминнащал архIал маихьларди. «Ургу та тукунсса ур, ина укунсса ура», – тIун къабучIиссар.
• ОьрчIал захIмат бувну дурсса давуртту къулагъас къадурну дитан къабучIиссар, чара бакъа цIа дуван аьркинссар.
• Лайкь дакъасса тIул дурсса чIумал оьрчIай аьй къадурну, цурда тIул оьккисса диркIшиву бувчIин буван аьркинссар.
• Шаппасса бигарду оьрчIайгу бишин аьркинссар, амма так гайннаща буван бюхъаймур. Бигар биттур бувайхту лайкьсса кьимат бищун аьркинссар.
• ОьрчI зухьва цала дакIниймур бусан ччай ухьурча, чара бакъа ганах вичIи дишин аьркинссар, цавува цува пикрирдавун агьну кьаитан къабучIиссар.
• ОьрчIайн чIявуну дяъвай, нитти-буттая ва цаярва хъуниминная нигь дутан къабучIиссар. ХIурмат лахьхьин буван аьркинссар, нигь дутан къабучIиссар.
