Ябувара талихIрал лахIзарду
Ина хъинну баххана хъанахъиссара, оьрмулий цалчин вилва оьрчI ххира буллалиний, уттиния тинмай ина хьхьичIава бивкIсса куццуйссагу къабикIантIиссара, вияту цамур инсан хьуссар.
Бюхъайссара ина хьхьи-чIавасса вихва бизаргума хъанан: оьннасса чIун, тархъаншиву дусса, буруккин бувансса ишругу чансса чIумалсса, мажалгу биялсса.
Вин бувчIинтIиссар гужну бувххусса чIун цукунссарив. ХьхьичIва тачIав къабувххусса кунма буххайхту. Гьантри бачинтIиссар куннил хъирив кув, циняв цалавхьхьусса кунма. АьтIаврил, чIивитIун ккукку буллалаврил, подгузник-ру даххана даврил,чансса шану лавхъсса ягу бувагу къалавхъсса лахIзардал бувцIусса.
Зун ххан бизангу бюхъайссар зува мудан цара-ца бизарсса даву дуллалисса кунма. Амма хъама мабитари… Гьармунил ахир-дазу дикIайссар. ДучIантIиссар ина оьрчIан махъва-махъ ккукку буллусса кьини. Яла му багьтIатI хьуну вил никирацI шанай лякъавантIиссар.
ДучIантIиссар ина шанашисса оьрчIайн махъва-махъсса ппай кусса кьинигу. Ина ца ппурттуву оьрчI карав увцуну занайрахха бусса. Яла дучIантIиссар оьрчI гьаз уван, карав уцин къахъанахъисса кьини.
Кьунниялай зу оьрчI щинавун учIан уллантIиссару, чурх шюшиншиврул. Ца кьини ганан цанма ччантIиссар цалва чурх цала шюшин. Ганал ка дикIантIиссар вил каниву, ххуллул тийн лахълахъисса ппурттуву. ДучIантIиссар кьини, вихьхьун ка къадуллуну цува лахъайсса. Дяхьхьуниву учIантIиссар вичIан кьинирдал ца кьини, ина цува ххира-ххуй уваншиврул. Ва иш тикрал къахьунсса кьинигу дучIантIиссар.
Ца кьини ина оьрчIащал архIал тяхъасса балай тIунтIиссара, хIазну сукку-кьютIугу тIий. Яла ина хъуна хьусса арснащал тачIав гукун шадну бала-гьалайлий къабикIантIиссара. Ганал вийн школалийн ачиннийн ппай учинтIиссар, цаппара хIаллаварив, ламусравун агьлай, ппай маучара ххишала учинтIиссар. Кьинирдал ца кьини ина ганахь хьхьувай махъва-махъ буккинтIиссар магьа, лишинтIиссар гъулуртусса ганал лажин. Ца ппурттувурив га ххарину вил хьунийн къалечинтIиссар. Цува гьаз ува тIий кару къатIитIинссар.
Иш мунивурхха бусса, зун къакIулссар вай укунсса ттюнгъашивурттал дазу хьунтIиссарив. Амма зун кIулссар, ми талихIрал бувцIусса лахIзарду лещантIишиву, я тикрал къашайшиву, я зана буван.
Мунияту зул оьрчI хъуна щейхту, ганал бикIантIиссар цаламур ххуллу, цаламур оьрму. Ганал оьрмулуву, га чIивинийсса чIумал кунма, ина ганан аьрш-куршлил заллунугу, щалла дунияллул дякюрунугу къабикIантIиссара. Ябувара кьадрулий талихIрал кIутIу тIисса лахIзарду!
ПатIимат Рамазанова
