Нитти-буттахъансса маслихIатру диндалул аьлимтурал луттирдава
ХIурмат бусса уссурвал ва ссурвал! ОьрчIру тарбия буллай байбишин аьркинссар га ниттил лякьлува бувксса кьини. Ганал дакI – марцIсса, кIяласса чIапIи куннассар: гьарзадрая асар шайссар – хъинмуниягу, оьмуниягу.
ЦIа дурксса, машгьурсса диндалул аьлимтурал луттирдаву кIицI лавгун бур оьрчIру тарбия баврил хIакъиравусса жунмасса насихIатру, жула ялун нанисса ник салихIсса, дин-мяърипат дусса хьуншиврул.
Ва макьалалуву жу цачIун буварду гай насихIатирттавасса цаппара.
- ОьрчIан диндалул аслу-гьанурду, чара бакъасса фикьгьилул (шариаьтрал) хIукмурду, Кьуръан буккаву, идавстурал ва салихIсса инсантурал оьрмулул тарих лахьхьин бувара.
- Нитти-буттах, муаьлимтурах, цаярва хъуниминнах вичIи дишин, увкумур лаласун лахьхьин бувара.
- Оьккисса, лайкь бакъасса дустурая архну битияра, цанчирча аьмал-хасият, тIул-тIабиаьт ца инсанная цаманайн лахъайссар.
- Ххуйсса тIул дурсса чIумал ганая цIа дувара цайминнал хьхьичI. Оьккисса тIул дуварчарив, халкьуннал хьхьичI дяъви мабувари, цувалусса кIанай гьужум къабувну, кьюкьин къаувну бувчIин бувара. Муданна аьй-бювкьурду дулларча, оьрчI аьдат хьуну, цаппара хIаллава гайннух къулагъас къадуллантIиссар.
- Аьркинсса кIанай начну, дакI хъун къадурну къуццу буллан лахьхьин бувара.
- Кьянкьану, яхI буну икIан, цаманал рищурча аькъатIун, цанна ччисса зад тIалав дуван къабюхъарча къума къалаган лахьхьин бувара. Спортрах гъира бутияра.
- ДукралучIа ва шанучIа ттюнгъашиву, танмалшиву дикIан къабучIишиву лахьхьин бувара.
- Оьккисса махъру тIун, цаярва заэвманан къаччан бикIан буллан, ссугру дуллан мабитари.
- Дацаву, зеххаву, азарт дусса тIуркIурдай буккаву, зуна баву, хIан хIачаву бунагьсса тIуллу душиву бувчIин бувара.
- ХьхьичI дарсру, дуккаву щаллу дуван аьркиншиву, так мунил хъирив тIуркIу тIун бучIишиву лахьхьин бувара.
Шикку чивчусса низам гьанулун ларсун оьрчIру тарбия буллалисса чIумал хъамамабитари жула дин – рахIмулул ва цIимилул дин душиву. КъабучIиссар хъиннура кьянкьашиву ккаккан дуллан. ОьрчIан цивппа мямман ва дадан ххирашиву чIалан аьркинссар.
