Ппиринжрал чантай
Ппиринжрал чантай
Мяммал дада дия чIава-хьулттийх кьатIув дуруглай. Гийх дякъий цIуну бувсса марххалттанийх тIанкIа тIий, гинмайсса микI лавчIсса мурхьирайн лехлай, цанна дуканмуних луглай бия ккашилсса чIелмулт, хъатIри, вяркъулт, хьхьиру. ЧIаравсса столданух цала дарс лахьлахьисса арснал арснахгу дурургун, увкуна:
– ХIасан, ургула дадал, гай лелуххантрах! Ккашилну бухьунссар мискинтал! Бяхълайгу бакъа бикIайссарив ва дякъий! Инт, гъи та дучIайвав тIий бухьунссар, ущу-щулгъи, уртту канан, ххуллийн багьсса къалмул ккукку бувчIлан. Гайннун цIана цадакьа хIалалли. Чиригу хьунссар.
– Мяммал дадай, гайннун цадакьа байссар школалул оьрчIал.
– Цукун цадакьа байссар, учав? – махIаттал хьуна мяммал дада.
– Яр, мяммал дадай, цинявппагу дуклаки оьрчIал дичлачиссар дяркъусса чIумал лелуххантран дукия. Гай бякъакъин буллалиссар къатри. Вана нагу жула ахъувусса мурхьирай лахъансса къатта буллалиссара.
– Гьала, мукунни уча иш бусса! На диркIссара ина ми тахтарду циван ххуку дуллай урвав тIий. Нарагу гьаннача та чантайлува гайннун къама бичин. Валлагь мунияр хъинсса чири къабикIанссар!
Мяммал дада гай бягу бявкъуну ккашилсса лелуххантран бичинсса къалмул чантай буцIин ларгуна. ВичIилий ия ххюра шинавусса Садикьгу.
Лавгуна гьантри. Садикьлул нину Парижагьан ахттайннай луглан диркIуна накь дансса ппиринжрах. Бивхьуний ппиринжрал чантай бакъая.
– Садикь, ва жула ппиринж бусса чантайвагу къаххалхьурив? – куна ниттил.
– Варив, дадай? – тIий, чарив ца бачIвасса чантай лавсун Садикь увкIуна.
– Яр, муния ппиринжрал бувцIуну буссия! Ми ци бувссар?
– Вар, дадай, мяммал дадалгу ккашилсса чIелмултран къалмул чантай бивчуннихха, ХIасан уссалгу гайннун къатри бувуннихха!
– Туну, цивхьуссар! Гьакссагу ххуйсса даву дурну дур!
– Нагу ппиринжрал чантай жула ахъувусса чIелмултран бичав!
