Мюнпатсса дуаьрду

КIюрххил ва гьанттайнмай хъама мабитав буккин:

– «Аятуль-Курси́»

– Сура «Аль-Ихляс» (3-ва)

– Сура «Аль-Фалякь» (3-ва)

– Сура «Ан-Нас» (3-ва)

– Дуаь

– Убайлул цIувххуну бур (жиндалухь): «Жу зуяту ссал буруччайссару?» Жиндалул жаваб дуллуну дур: «Аль-Бакьара» тIисса суралувасса «Аятуль-Курсилул». Ва аят кIюрххил бувккума гьанттайннин жуяту урувччуну уссар, гьанттайнмай бувккума кIюрххилнин урувччуссар». Чани шайхту Убай лавгун МухIаммад ИдавсичIан (с.аь.с.) цанма ккавкмур бувсун бур. Идавсил (с.аь.с.) увкуну бур: «Ганил вихь тIайлану бувсун бур, цуппа мурдалсса бунугу» (ан-Насаи, ат-ТIабарани, Ибн ХIиббан).

– Аьбдуллагь ибн Хубайблул бувсун бур Идавсил (с. аь. с.) цахьва увкумур: «Букки "Кьуль гьува-Ллагьу ахIад" («Аль-Ихляс») ва кIива "буруччайсса" сура («Аль-Фалякь» ва «Ан-Нас») шам-шамилва гьарца кьини кIюрххил ва гьанттайнмай, миннул ина уруччинтIиссара циняр оьшивурттая (ат-Тирмизи, Абу Давуд, ан-Насаи).

Ялагу Идавсил (с.аь.с.) увкуссар: «Гьарца кьини кIюрххил ва гьанттайнмай шамилла ва дуаь дуккайманан ссалчIав зарал биян къабувантIиссар:

 بِسْمِ اللَّهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ

«БисмиЛля́гьи ллязи́ ля́ язурру мааьсмигьи́ шай’ун филь-арзи ва ля́ фи-с-сама́и, ва гьува ссами́оьль-аьли́м».

Мяъна: «Аллагьнал цIанищал, аьрщарайгу ссавруннайгу ссаячIав зарал къабияйсса. Заннан гьарзад баяйссар, кIулссар».

Вай сурарду ва дуаьртту ккаларча, жува Аллагьнал ﷻ цIимилийну буруччинтIиссару янил шаврия, бахIурдая ва гьарца оьмуния»